ویرات کوہلی اور روہت شرما کے ورلڈ کپ 2027 کھیلنے کا امکان نہیں،بھارتی میڈیا

اتوار 10 اگست 2025 17:20

نئی دہلی (اُردو پوائنٹ اخبارتازہ ترین - این این آئی۔ 10 اگست2025ء)بھارتی کرکٹ ٹیم کے سابق کپتان ویرات کوہلی اور روہت شرما کے ون ڈے کرکٹ سے بھی الگ ہونے کی خبریں پھر سامنے آنے لگیں۔بھارتی میڈیا کے مطابق ویرات کوہلی اور روہت شرما کے آئی سی سی کرکٹ ورلڈ کپ 2027 کھیلنے کا امکان نہیں ہے، ان دونوں کھلاڑیوں کی آسٹریلیا کے خلاف الوداعی سیریز ہوسکتی ہے۔

یاد رہے کہ ویرات کوہلی ٹی ٹوئنٹی اور ٹیسٹ کرکٹ سے پہلے ہی ریٹائر ہو چکے ہیں۔

(جاری ہے)

بھارتی میڈیا کے مطابق بھارتی کرکٹ بورڈ ٹیسٹ کی طرح اب ون ڈے ٹیم بھی نوجوان کھلاڑیوں پر مشتمل دیکھنا چاہتا ہے، اس سلسلے میں ورلڈ کپ تک کھیلنے کی خواہش رکھنے کے لیے ان دونوں کرکٹرز کو دسمبر میں وجے ہزارے ٹرافی کھیلنا ہوگی۔اس سال کے آغاز میں کرکٹرز کو رانجی ٹرافی بھی کھیلنے کا کہا گیا تھا، کرکٹرز رانجی ٹرافی کھیلنے کے بعد ٹیسٹ کرکٹ سے بھی ریٹائر ہوگئے تھے۔

بھارتی میڈیا کے مطابق سلیکٹرز کی جانب سے نوجوان کرکٹرز کے ارد گرد ٹیم رکھنے کی وجہ سے سینئر کرکٹرز الگ ہوسکتے ہیں۔ ویرات کوہلی اور روہت شرما نے خاموشی اختیار رکھی تو سمجھا جائے گا کہ وہ ریٹائرمنٹ لے رہے ہیں۔واضح رہے کہ بھارت نے آسٹریلیا میں ون ڈے سیریز اکتوبر میں کھیلنی ہے۔