ریجنل سپورٹس آفس پشاور کے تحت جشنِ آزادی کے سلسلے میں باکسنگ اور ووشو کے مقابلے شروع

اتوار 10 اگست 2025 20:50

پشاور (اُردو پوائنٹ اخبارتازہ ترین - اے پی پی۔ 10 اگست2025ء) ریجنل سپورٹس آفس پشاور کے تحت جشنِ آزادی کے سلسلے میں قیوم سپورٹس کمپلیکس پشاور میں باکسنگ اور ووشو کے مقابلے شروع ہوگئے۔ باضابطہ افتتاح ایڈیشنل ڈپٹی کمشنر فنانس اینڈ پلاننگ پشاور اصغر سورانی نے کیا۔ ان کے ہمراہ ریجنل سپورٹس افسر پشاور کاشف فرحان سمیت دیگراہم شخصیات موجود تھیں۔

انٹر کلب باکسنگ مقابلوں میں ضلع بھر سے 14 کلبز کے 70 سے زائد کھلاڑی 8 مختلف ویٹ کیٹگری میں مد مقابل ہوں گے۔ مقابلے دو دن تک جاری رہینگے۔

(جاری ہے)

اسی طرح انٹر کلب ووشو کے مقابلے بھی پشاور سپورٹس کمپلیکس میں شروع ہوگئے جن میں 8 کلبز کے سو سے زائد کھلاڑی 7 مختلف ویٹ میں شریک ہیں۔ اس موقع پر خیبرپختونخوا ووشو ایسوسی ایشن کے سربراہ رحمت گل آفریدی سمیت دیگراہم شخصیات موجود تھیں۔

جشن آزادی کے سلسلے میں مختلف تقاریب جاری ہیں۔ 11 اگست کو بیڈمنٹن، ٹیک بال اور باسکٹ بال کے میل و فیمل ایونٹس قیوم اسٹیڈیم پشاور میں ہوں گے جبکہ 12 اگست کو لیکروس اور جوڈو کے مقابلے شیڈول ہیں۔ 14 اگست کو دن میں ٹیبل ٹینس اور ہاکی کے مقابلے ہوں گے جبکہ رات کو میوزیکل کنسرٹ میں پشتو و اردو موسیقی، علاقائی رقص، میجک شو اور مارشل آرٹس کے ساتھ ساتھ آتشبازی کا شاندار مظاہرہ ہوگا۔