سعودی عرب کے علاقے باحہ میں میلہ جاری،سیاحوں کو پتھر پر پکائی گئی روایتی روٹی المقناہ پیش کی جارہی ہے

پیر 11 اگست 2025 09:30

ریاض (اُردو پوائنٹ اخبارتازہ ترین - اے پی پی۔ 11 اگست2025ء) سعودی عرب کے علاقے باحہ میں جاری میلے کے دوران ایسی روایتی روٹی’’ المقناہ‘‘ سیاحوں کے لیے تیار کی جارہی ہے جو پتھر پر رکھ کر پکائی جاتی ہے۔سعودی خبررساں ادارے(ایس پی اے )کے مطابق مملکت کے ہرخطے میں مختلف رسم و رواج نسل در نسل چلے آ رہے ہیں اور المقناہ روٹی باحہ کے روایتی پکوان کا لازمی جزو ہے۔

مقامی ہنرمند یہ ڈش مارکیٹوں اور فیسٹول میں تیار کرتے ہیں جہاں بڑی تعداد میں لوگ شریک ہوتے ہیں۔سعودی عرب کی کلنری آرٹس کمیشن نے المقناہ کو سرکاری ڈش کے طور پر تسلیم کیا ہے جو اپنی منفرد ذائقے کے لیے مشہور ہے۔حالیہ آٹھویں الطاولہ فیسٹول میں ایک المقناہ پویلین قائم کیا گیا جہاں آنے والے لوگ روٹی بنتے ہوئے دیکھ سکتے تھے۔

(جاری ہے)

نانبائی احمد الشیوخ نے بتایا گندم کے آٹے سے تیار کیا گیا آٹا گول شکل میں پھیلا کر گرم پتھر پر پکایا جاتا ہے اور پھر اسے پکانے کے لیے مٹی یا دھات کے ڈھکن سے ڈھانپ کر گرم راکھ اور انگاروں میں دبا دیا جاتا ہے۔

انہوں نے بتایا کہ اس روایتی طریقے سے روٹی میں خاص دھوئیں جیسا ذائقہ اور کرکرا پن آتا ہے اور عموماً یہ گھی، شہد یا دہی کے ساتھ پیش کی جاتی ہے۔یہ فیسٹول مقامی ہنرمندوں کو ور ثہ محفوظ رکھنے میں مدد اور ثقافتی سیاحت کو فروغ دیتا ہے۔