یوکرین میں امریکی فوج نہیں بھیجیں گے، ٹرمپ کا اعلان

یورپی رہنمائوں نے امن کے کسی بھی ممکنہ معاہدے کے لیے تیاریاں تیز کر دی ہیں، بیان

بدھ 20 اگست 2025 16:02

یوکرین میں امریکی فوج نہیں بھیجیں گے، ٹرمپ کا اعلان

واشنگٹن(اُردو پوائنٹ اخبارتازہ ترین - این این آئی۔ 20 اگست2025ء) امریکی صدر ڈونلڈ ٹرمپ نے واضح کیا ہے کہ یوکرین میں کسی بھی ممکنہ امن معاہدے کی صورت میں امریکہ اپنی فوج نہیں بھیجے گا، تاہم فضائی مدد فراہم کی جا سکتی ہے۔ٹرمپ نے دعوی کیا کہ پوٹن نے زیلنسکی سے ملاقات پر رضامندی ظاہر کی ہے اور کچھ مغربی سیکیورٹی ضمانتوں کو قبول کیا ہے، تاہم کیف اور مغربی دارالحکومتوں نے ان دعوں پر احتیاط کا اظہار کیا ہے۔

رپورٹس کے مطابق پوٹن نے تجویز دی کہ اجلاس ماسکو میں ہو، لیکن زیلنسکی نے فورا اس تجویز کو مسترد کر دیا۔ٹرمپ نے کہا کہ یورپی ممالک جیسے فرانس، جرمنی اور برطانیہ زمینی افواج تعینات کرنے کے لیے تیار ہیں، تاہم امریکہ صرف فضائی مدد فراہم کرے گا۔ انہوں نے زور دیا: آپ کو میری یقین دہانی ہے کہ امریکی فوج زمین پر نہیں ہوگی، اور میں صدر ہوں۔

(جاری ہے)

یورپی رہنمائوں نے امن کے کسی بھی ممکنہ معاہدے کے لیے تیاریاں تیز کر دی ہیں۔ برطانوی وزیر اعظم کیر اسٹارمر نے اتحادی ممالک کے ساتھ مشاورت کے بعد کہا کہ اگر لڑائی رک گئی تو ایک ری ایشورنس فورس کی تعیناتی کے لیے تیاری کی جائے گی۔ اسی دوران نیٹو کے 32 ممالک کے فوجی سربراہان بھی ویڈیو لنک پر یوکرین کے معاملے پر اجلاس کریں گے۔ادھر روس نے کہا ہے کہ کسی بھی حل میں اس کے سیکیورٹی مفادات کا بھی تحفظ ہونا چاہیے اور یوکرین کی نیٹو میں شمولیت کسی صورت قبول نہیں کی جائے گی۔ روسی وزیر خارجہ سرگئی لاوروف نے کہا کہ سربراہی اجلاس سے قبل انتہائی جامع تیاری ضروری ہے۔