بورے والا،تھانہ صدر پولیس نے دوران واردات ٹیکسی ڈرائیور کے اندھےقتل میں ملوث ملزمان گرفتار کرلئے

پیر 11 اگست 2025 13:13

بورے والا (اُردو پوائنٹ اخبارتازہ ترین - اے پی پی۔ 11 اگست2025ء) ڈرائیور کے اندھے قتل معہ ڈکیتی کا معمہ حل ہو گیا اور ملوث 3 ملزمان گرفتار، گاڑی برآمد کر کے مقتول کے بچوں کے حوالے کر دی گئی۔ پولیس تھانہ صدر بوریوالا نے اہم کامیابی حاصل کرتے ہوئے ٹیکسی ڈرائیور کے قتل معہ ڈکیتی کے مقدمہ میں ملوث تین ملزمان کو گرفتار کر لیا ملزمان کے قبضہ سے ڈکیتی شدہ گاڑی بھی برآمد کر لی گئی ۔

27 اپریل 2025 کی رات ملزمان واردات کی نیت سے لاری اڈا بوریوالا سے وہاڑی جانے کے لیے سواریاں بن کر ساجد محمود کی گاڑی میں بیٹھے۔ ملزمان نے 515 ای بی کے قریب گاڑی چھینی اور مذاحمت پر ٹیکسی ڈرائیور ساجد محمود کو فائرنگ کر کے قتل کر دیا اور فرار ہو گئے۔ پولیس تھانہ صدر بوریوالا نے واقعہ کا فوری طور پر مقدمہ درج کر کے تفتیش کا آغاز کر دیا ،ڈی پی او وہاڑی محمد افضل نے مقدمہ کو ٹریس کرنے کے لئے ایس ایچ او تھانہ صدر بوریوالا محمد زبیر سندھو اور سب انسپکٹراحمد کامران پر مشتمل خصوصی ٹیم تشکیل دی، پولیس کی ٹیم نے جدید ٹیکنالوجی،سی سی ٹی وی فوٹیج اور خفیہ ذرائع سے حاصل معلومات کی بنیاد پر قتل میں ملوث تین ملزمان کو ٹریس کیا۔

(جاری ہے)

پولیس ٹیم نے ملزمان کی گرفتاری کے لئے فیصل آباد،اوکاڑہ،جڑانوالہ،لاہور سمیت مختلف اضلاع میں لگاتار ایک ماہ ریڈ کئے اور آخر کار کامیابی حاصل کی۔ پولیس کی ٹیم نے کامیاب کارروائی کرتے ہوئے مرکزی ملزم شہزاد سمیت عثمان مصطفی اور حسن کو گرفتار کر لیا گرفتار ملزمان کے قبضے سے واردات میں استعمال ہونے والا اسلحہ اور گاڑی بھی برآمد کر لی گئی، ملزمان کو شناخت پریڈ کے بعد جوڈیشل کر دیا گیا، ڈی پی او وہاڑی محمد افضل اور ایس ڈی پی او سرکل بوریوالا رانا عمران ٹیپو نے ایک تقریب کے دوران برآمد ہونے والی گاڑی مقتول ڈرائیور کے بچوں کے حوالے کر دی۔

ڈی پی او وہاڑی محمد افضل نے کارروائی میں حصہ لینے والی ٹیم کے لئے ایک لاکھ روپے انعام اور سی سی تھری سرٹیفکیٹس کا اعلان بھی کیا۔\378