فیصل آباد ، آزاد پاکستان کے تھیم کے تحت بازاروں، مارکیٹوں، شاہراہوں،سرکاری و نیم سرکاری عمارات کو خوبصورتی سے سجانے کا عمل جاری

پیر 11 اگست 2025 13:19

فیصل آباد (اُردو پوائنٹ اخبارتازہ ترین - اے پی پی۔ 11 اگست2025ء) یوم آزادی کے حوالے سے آزاد پاکستان کے تھیم کے تحت فیصل آباد کے بازاروں، مارکیٹوں، شاہراہوں، تجارتی عمارات، گلی محلوں، سرکاری و نیم سرکاری عمارات کو خوبصورتی سے سجانے کا عمل جاری ہے جس میں فیصل آباد کی تاجر برادری اور نوجوان بڑھ چڑھ کر حصہ لے رہے ہیں۔انجمن تاجران سٹی فیصل آباداورمختلف تاجر تنظیموں کی جانب سے کہا گیا ہے کہ تحریک پاکستان اورتعمیرپاکستان میں تاجر برادری کے شاندار کردار کو نظر انداز نہیں کیا جاسکتا جبکہ نئی نسل کو آزادی کی قدر و قیمت سے آشنا رکھنا بھی ضروری ہے۔

انہوں نے کہا کہ تاجر کاروباری سرگرمیوں کے ذریعے وطن کی خدمت کے ساتھ ساتھ دکھی انسانیت کی بھلائی کیلئے بھی فلاحی منصوبوں پر عمل پیرا ہے اور وہ کسی بھی مشکل وقت میں امدادی سرگرمیوں میں ہمیشہ پیش پیش رہے ہیں جو کہ وطن اور ہم وطنوں سے ان کی گہری محبت کا واضح ثبوت ہے۔

(جاری ہے)

انہوں نے کہا کہ چوک گھنٹہ گھرکے ۱ٓٹھوں بازاروں سمیت دیگر بازاروں اور مارکیٹوں، غلہ و سبزی منڈیوں اور دیگر کاروباری مراکز کو قومی پرچموں اور دیگر آرائشی اشیا سے سجایا جارہا ہے۔انہوں نے بتایا کہ شہدا کی یاد گاروں پر پھول چڑھانے کے علاوہ یوم آزادی کے موقع پرغربا میں کھانا تقسیم کرنے کا پروگرام بھی وضع کیا گیا ہے۔