محتسب پنجاب کے احکامات پر صوبے کے مختلف اضلاع میں 8 کنال 14 مرلے سرکاری اراضی واگزار کروا لی گئی

پیر 11 اگست 2025 17:25

لاہور (اُردو پوائنٹ اخبارتازہ ترین - اے پی پی۔ 11 اگست2025ء) محتسب پنجاب کے احکامات پر صوبے کے مختلف اضلاع میں ناجائز قابضین سے 8 کنال 14 مرلے سرکاری اراضی واگزار کروا لی گئی ہے ،یہ اراضی مختلف سرکاری محکموں کی ملکیت تھی، جس پر قابض عناصر نے غیرقانونی طور پر دکانیں اور دیگر تعمیرات کھڑی کر رکھی تھیں۔ متعلقہ محکموں کی جانب سے زمین واگزار کرانے کی متعدد کوششیں کی گئیں تاہم قابضین کو بے دخل نہیں کیا جا سکا۔

(جاری ہے)

شکایات موصول ہونے اور تحقیقات مکمل ہونے کے بعد محتسب پنجاب نے مداخلت کرتے ہوئے زمین واگزار کرانے کے احکامات جاری کیے، جن پر عملدرآمد کے بعد اراضی کو دوبارہ سرکاری تحویل میں لے لیا گیا۔کارروائی سے قبل قانونی طریقہ کار کے مطابق زمین کی حد بندی مکمل کی گئی۔ یہ اقدام محتسب پنجاب کی غیرجانبدارانہ حکمت عملی کا مظہر ہے، جو سرکاری زمینوں پر قبضے اور ان کے غلط استعمال کے خلاف سخت موقف رکھتے ہیں۔مقامی رہائشیوں اور درخواست گزاروں نے محتسب پنجاب کے بروقت اقدام کو سراہا ہے اور اسے قانون کی حکمرانی کے قیام اور عوامی وسائل کے تحفظ کی جانب ایک مثبت پیش رفت قرار دیا ہے۔