لاہورمیں انسدادتجاوزات آپریشن جاری، 19 ٹرک سامان ضبط ،ضلعی انتظامیہ

منگل 12 اگست 2025 15:41

لاہور (اُردو پوائنٹ اخبارتازہ ترین - اے پی پی۔ 12 اگست2025ء) ضلعی انتظامیہ کی جانب سے شہر بھر میں تجاوزات کے خلاف بھرپور آپریشن جاری ہے، گزشتہ 24 گھنٹوں کے دوران 19 ٹرک سامان ضبط کر لیا گیا۔ترجمان ضلعی انتظامیہ کے مطابق لاری اڈا، داتا دربار اور جی ٹی روڈ سمیت متعدد علاقوں کو تجاوزات سے مکمل طور پر صاف کردیا گیا۔انتظامیہ کی کارروائیوں میں 418 تجاوزات اور 608 غیر قانونی بینرز ہٹا دیے گئے۔

آپریشن کی نگرانی میٹروپولیٹن آفیسر ریگولیشن کاشف جلیل کر رہے ہیں، جنہوں نے بتایا کہ ڈپٹی کمشنر لاہور کی ہدایت پر یہ کارروائیاں روزانہ کی بنیاد پر جاری ہیں۔ ان کے مطابق ٹیمیں شہر کے ہر کونے میں متحرک ہیں، عوامی راستے کلیئر کرائے جا رہے ہیں اور دکانداروں کا فٹ پاتھوں پر رکھا سامان ضبط کیا جا رہا ہے، کسی کو قانون ہاتھ میں لینے کی اجازت نہیں دی جائے گی۔

(جاری ہے)

ڈپٹی کمشنر لاہور سید موسی رضا نے کہا کہ لاہور کو تجاوزات سے پاک شہر بنانا اولین ترجیح ہے، آپریشن کا مقصد شہریوں کو کشادہ سڑکیں اور راستے فراہم کرنا ہے۔ انہوں نے واضح کیا کہ قانون کی بالادستی پر کوئی سمجھوتہ نہیں ہوگا اور آپریشنز میں کسی کو رعایت نہیں دی جائے گی۔ ان کا کہنا تھا کہ وزیر اعلی پنجاب کی خصوصی ہدایت پر یہ مہم اس وقت تک جاری رہے گی جب تک لاہور سے تجاوزات کا مکمل خاتمہ نہ ہو جائے۔