ہانیہ عامر کا چلتی بائیک پر رقص، شنیرا اکرم نے اداکارہ کو آڑے ہاتھوں لے لیا

شنیرا اکرم نے ہانیہ عامر کے بغیر ہیلمٹ تیز رفتار موٹر سائیکل پر کھڑے ہونے کی ویڈیو پر شدید تحفظات کا اظہار کیا

ذیشان مہتاب منگل 12 اگست 2025 12:34

ہانیہ عامر کا چلتی بائیک پر رقص، شنیرا اکرم نے اداکارہ کو آڑے ہاتھوں ..

لاہور (اردو پوائنٹ تازہ ترین اخبار ۔ 12 اگست 2025ء ) ہانیہ عامر اداکاری کے علاوہ اپنے شاندار انداز، دلکش مسکراہٹ اور خوبصورتی کے باعث کافی مقبولیت رکھتی ہیں تاہم اس بار وہ اپنی ایک ویڈیو کے باعث تنقید کی زد میں ہیں۔

معاملہ کچھ یوں ہے کہ حال ہی میں ہانیہ عامر نے انسٹاگرام پر ایک ویڈیو شیئر کی جس میں وہ کراچی کی سڑکوں پر بغیر ہیلمٹ لگائے موٹر سائیکل پر سفر کرتی دکھائی دیں۔

ویڈیو میں وہ تیز رفتار موٹر سائیکل کی پچھلی نشست پر کھڑی ہو کر رقص اور مختلف کرتب دکھانے لگیں جبکہ ان کے ساتھی بھی بغیر کسی حفاظتی تدابیر کے موٹر سائیکل چلا رہے تھے۔

لیجنڈری کرکٹر وسیم اکرم کی آسٹریلوی نژاد اہلیہ شنیرا اکرم نے ہانیہ عامر کی اس ویڈیو کو ’غیر ذمے دارانہ‘ قرار دیتے ہوئے اپنے تحفظات کا اظہار کیا۔

(جاری ہے)

شنیرا اکرام نے اپنی پوسٹ میں لکھا کہ ’میں برسوں سے روڈ سیفٹی کے لیے کام کر رہی ہوں۔

ہم سب کو بالخصوص مشہور شخصیات کو چاہیے کہ وہ اپنے فالوورز پر مثبت اثر ڈالیں۔ یہ ویڈیو خطرناک اور غیر محتاط رویے کو فروغ دیتی ہے۔

انھوں نے مزید کہا کہ ان کا ہانیہ عامر سے کوئی ذاتی مسئلہ نہیں اور وہ خوش ہیں کہ ہانیہ کو کوئی چوٹ نہیں آئی، لیکن سوشل میڈیا پر شیئر کیے گئے مناظر ہزاروں نوجوانوں کے لیے خطرناک مثال بن سکتے ہیں۔

View this post on Instagram

شنیرا اکرم کی اس پوسٹ پر تاحال ہانیہ عامر نے کوئی ردعمل نہئیں دیا تاہم سوشل میڈیا صارفین نے شنیرا اکرم کی بات کی تائید کرتے ہوئے کہا کہ ہانیہ عامر کو روڈ سیفٹی کو اجاگر اور ٹریفک قوانین کی پاسداری کرنا چاہئے تھی۔