Live Updates

بورڈ کا سلمان آغا کی قیادت پر مکمل اعتماد کا اظہار ، پروٹیز کیخلاف ٹی ٹونٹی میں بابر اور رضوان کی واپسی ناممکن

کوچ اور کپتان ٹیم میں تبدیلیوں کے خواہشمند نہیں، سلمان علی آغا ہی جنوبی افریقا کے خلاف قیادت کے فرائض انجام دینگے: ذرائع

ذیشان مہتاب بدھ 8 اکتوبر 2025 11:33

بورڈ کا سلمان آغا کی قیادت پر مکمل اعتماد کا اظہار ، پروٹیز کیخلاف ٹی ..

لاہور (اردو پوائنٹ تازہ ترین اخبار ۔ 8 اکتوبر 2025ء ) پاکستان کرکٹ بورڈ کی سلیکشن کمیٹی کی جانب سے قومی ٹی ٹوئنٹی ٹیم کے کپتان سلمان علی آغا پر مکمل اعتماد کا اظہار کیا گیا ہے اور اس بات کا قوی امکان ہے کہ جنوبی افریقا کے خلاف سیریز میں وہ ہی گرین شرٹس کی قیادت کریں گے۔

نجی ٹی وی جیو نیوز کے ذرائع کے مطابق پاکستان ٹی 20 ٹیم کے کپتان سلمان علی آغا اور کوچ مائیک ہیسن کے درمیان جنوبی افریقا کے خلاف سیریز اور آئی سی سی ٹی 20 ورلڈ کپ کے حوالے سے تبادلہ خیال ہوا، کپتان اور کوچ آئی سی سی ٹی 20 ورلڈ کپ کو دیکھتے ہوئے قومی ٹیم کے کمبی نیشن کو مضبوط اور مستحکم کرنے کے خواہش مند ہیں۔

ذرائع کا بتانا ہے کہ ٹیم مینجمنٹ کے تھنک ٹینک کی سلیکشن کمیٹی کے ساتھ جلد بیٹھک متوقع ہے، ممکن ہے کہ جنوبی افریقا کے خلاف ٹیسٹ سیریز کے دوران وائٹ بال ٹیم کا کیمپ شروع کیا جائے گا جس کے لیے ممکنہ کھلاڑیوں کے نام جلد سامنے آجائیں گے۔

(جاری ہے)

ابتدائی اطلاعات کے مطابق پاکستان ٹی 20 ٹیم میں دو سابق کپتانوں بابر اعظم اور وکٹ کیپر محمد رضوان کی واپسی کا امکان نا ہونے کے برابر ہے کیونکہ پاکستان ٹی 20 کے کپتان سلمان علی آغا جن کی قیادت کے حوالے سے بورڈ اور ٹیم مینجمنٹ کو کسی قسم کے تحفظات نہیں ہیں، وہ جنوبی افریقا کے خلاف سیریز میں نمبر تین پر بیٹنگ کریں گے۔

پاکستان کے لیے 32 ٹی ٹونٹی میں 110.21 کے اسٹرائیک ریٹ سے 561 رنز بنانے والے دائیں ہاتھ کے بیٹر نے ایشیا کپ کے 7 میچوں میں صرف 72 رنز بنائے تھے، ان کی اس کارکردگی پر کپتان کو تنقید کا سامنا ہے۔

البتہ بورڈ اور ٹیم کے کوچ مائیک ہیسن آئی سی سی ٹی 20 ورلڈ کپ سے قبل کپتانی کی تبدیلی کے لیے تیار نہیں ہیں۔

دوسری جانب یہ اطلاعات بھی ہیں کہ ایشیا کپ کے 7 میچوں میں چار بار صفر پر آؤٹ ہونے والے صائم ایوب جنھیں ٹیسٹ ٹیم سے ڈراپ کردیا گیا ہے، وائٹ بال کرکٹ میں ان پر اعتماد برقرار رکھنے کا فیصلہ کیا گیا ہے جب کہ وکٹ کیپر محمد حارث بھی خطرے میں نہیں ہیں، البتہ فاسٹ بولنگ میں حارث روف کی جگہ دیگر فاسٹ بولرز کو موقع دینے پر اتفاق کیا گیا ہے۔

اطلاعات کے مطابق کوچ مائیک ہیسن اور کپتان سلمان علی آغا پاکستان ٹی 20 اسکواڈ کے ایشیا کپ فائنل میں شکست پرافسردہ ضرور ہیں لیکن وہ اس ٹیم کو تسلسل کے ساتھ موقع دینے کے حق میں ہیں اور اس بات کے امکانات نا ہونے کے برابر ہیں کہ سابق کپتان بابر اعظم اور وکٹ کیپر محمند رضوان کو جنوبی افریقا کے خلاف ٹی 20 سکواڈ میں موقع دیا جائے گا۔