بھارتی کرکٹ لیگ کی ڈالرز کی ریل پیل سے آسٹریلوی کرکٹرز کو ورغلانے کی کوشش ، ملین ڈالرز پیشکش کا انکشاف

پیٹ کمنز اور ٹریوس ہیڈ کو یہ پیشکش بھارتی پریمئیر لیگ کے ایک ٹیم گروپ نے رواں برس کے آغاز میں کی، کرکٹرز نے بتایا کہ ان کی ملک سے مکمل کمٹمنٹ ہے

ذیشان مہتاب بدھ 8 اکتوبر 2025 12:02

بھارتی کرکٹ لیگ کی ڈالرز کی ریل پیل سے آسٹریلوی کرکٹرز کو ورغلانے ..

لاہور (اردو پوائنٹ تازہ ترین اخبار ۔ 8 اکتوبر 2025ء ) بھارتی لیگ کے ایک ٹیم گروپ نے آسٹریلیا کے کرکٹرز کو ڈالرز کا لالچ دیا مگر کرکٹرز نے ڈالروں کے بجائے نیشنل ڈیوٹی کو ترجیح دی۔

اس حوالے سے آسٹریلوی میڈیا کی رپورٹ کے مطابق 2 آسٹریلوی کرکٹرز کو آسٹریلوی کرکٹ چھوڑنے کے لیے 10 ملین ڈالرز کی پیشکش کی گئی، کرکٹرز کو تقریبا 10 ملین ڈالرز کا سالانہ دینے کا کہا گیا۔

آسٹریلوی میڈیا کا کہنا ہے کہ کپتان پیٹ کمنز اور نائب کپتان ٹریوس ہیڈ کو کل وقتی اورسیز ٹی ٹونٹی لیگز کھیلنے کے لیے پیشکش کی گئی مگر ان دونوں نے بھارتی پیشکش کو ٹھکرا دیا تھا۔

آسٹریلوی میڈیا کے مطابق ان کرکٹرز کو پیشکش بھارتی پریمئیر لیگ کے ایک ٹیم گروپ نے رواں برس کے آغاز میں کی، کرکٹرز نے بھارت کے ٹیم گروپ کو بتایا کہ ان کی ملک سے مکمل کمٹمنٹ ہے۔

(جاری ہے)

آسٹریلوی رپورٹ میں بتایا گیا کہ ٹاپ آسٹریلوی کرکٹرز نیشنل کنٹریکٹس سے سال میں 1.5 ملین ڈالرز کماتے ہیں، پیٹ کمنز کپتانی کا الاؤنس ڈال کر تقریبا 3 ملین ڈالرز کماتے ہیں۔

آسٹریلوی میڈیا نے انکشاف کیا کہ ڈالروں کی پیشکش کا انکشاف بگ بیش لیگ کو پرائیویٹائز کرنے کے حوالے سے ہونے والے اجلاس میں ہوا ، اس اجلاس میں کہا گیا کہ کرکٹ آسٹریلیا کی مالی معاملات میں کس قدر کمزوری پائی جاتی ہے۔

یاد رہے کہ 2023ء میں انگلینڈ کے جوفرا آرچر کو بھارتی لیگ کی ایک ٹیم نے پیشکش کی تھی اور آرچر کو ایک سال کے لیے 7.5 ملین ڈالرز کی آفر کی گئی تھی جو انہوں نے قبول کرنے سے منع کردیا تھا۔