لیسکو،بہترین کارکردگی دکھانے والے افسران و ملازمین کے اعزاز میں تقریب کا انعقاد

لاہور (اُردو پوائنٹ اخبارتازہ ترین - اے پی پی۔ 12 اگست2025ء) ایکسپو سنٹر لاہور میں لیسکو کے بہترین کارکردگی دکھانے والے افسران و ملازمین کے اعزاز میں منگل کے روز یہاں ایک شاندار تقریب منعقد ہوئی۔یہ تقریب وفاقی وزیر توانائی سردار اویس احمد خان لغاری کی ہدایات اور ڈسکوز سپورٹ یونٹ کی رہنمائی میں مالی سال 2024-25 کے دوران شاندار کارکردگی کے اعتراف میں منعقد کی گئی۔

تقریب کے مہمانِ خصوصی چیئرمین بورڈ آف ڈائریکٹرز لیسکو عامر ضیا اور چیف ایگزیکٹو لیسکو انجینئر محمد رمضان بٹ تھے،جنہوں نے معزز مہمانان،افسران اور ملازمین میں شیلڈز اور سرٹیفکیٹس تقسیم کئے۔تقریب میں معزز مہمانانِ کواعزازی شیلڈز پیش کی گئیں،جن میں پراجیکٹ اینالسٹ اے ڈی بی احتشام خٹک ،کنسلٹنٹ اے ڈی بی افشاں سعید،سیکٹر کمانڈر رینجرز برگیڈیئر سید نیر عباس،سی سی پی او لاہور بلال صدیق کمیانہ،لیسکوبورڈ ممبران طاہر بشارت چیمہ،محمد خالد خان اور رانا عبیداللہ انور شامل ہیں۔

(جاری ہے)

تقریب سے خطاب کرتے ہوئے جوائنٹ سیکرٹری پاور ڈویژن محمد خالد خان نے کہاکہ لیسکو کا مقصد شفاف، مستحکم اور صارف دوست توانائی نظام کا فروغ ہے،یہ ایوارڈز نہ صرف اعزاز بلکہ ذمہ داری کا احساس بھی دلاتے ہیں کہ ہم سب مل کر لیسکو کو مزید بہتر بنانے میں اپنا کردار ادا کریں۔چیئرمین بورڈ آف ڈائریکٹرز لیسکو عامر ضیا نے اپنے خطاب کے دوران کہاکہ وفاقی وزیر توانائی سردار اویس احمدخان لغاری کی ہدایات کی روشنی میں لیسکو کے افسران و ملازمین نے اپنی محنت،پیشہ ورانہ مہارت اور لگن سے ادارے کی کارکردگی میں نمایاں بہتری پیدا کی ہے۔

یہ ایوارڈز ان کی خدمات کا اعتراف اور حوصلہ افزائی ہیں۔ان کا کہنا تھا کہ وہ سال2025-26 کیلئے دعا گو ہیں کہ لیسکو مزید کامیابیاں حاصل کرے۔چیف ایگزیکٹو لیسکو انجینئر محمد رمضان بٹ نے کہا کہ لیسکو ہماری ماں ہے،لیسکو کی کامیابی کا راز ٹیم ورک اور محنت میں پوشیدہ ہے،لیسکو کا لائن سٹاف ادارے میں ریڑھ کی ہڈی کی حیثیت رکھتا ہے،ہم صارفین کو بلا تعطل بجلی فراہمی اور بہترین سہولیات فراہم کرنے کیلئے پرعزم ہیں،ہمارا مقصد ایک شفاف،مستحکم اور صارف دوست توانائی نظام کو فروغ دینا ہے۔

چیف ایگزیکٹو لیسکو انجینئر محمد رمضان بٹ نے ایوارڈز تقسیم کرتے ہو ئے کہا کہ یہ اعزازات ان افسران و ملازمین کی شاندار کارکردگی کا اعتراف ہے،جنہوں نے اپنے فرائض دیانت داری اور لگن سے انجام دیئے۔لیسکو بورڈ ممبر طاہر بشارت چیمہ نے اپنے خطاب میں کہا کہ لیسکو کا ہر شعبہ ملکی ترقی اور عوام کی خدمت میں اہم کردار ادا کر رہا ہے اور ایسی تقریبات ملازمین میں خدمت کا جذبہ مزید بڑھاتی ہیں۔تقریب میں میڈیا نمائندگان اور لیسکو کے مختلف شعبہ جات سے تعلق رکھنے والے اعلی افسران و ملازمین نے بھی بھرپور شرکت کی۔