حیات آباد خوڑ اور اچینی خوڑ کے اطراف سات سات ہزار پودے لگانے کا آغاز، صوبائی مشیر خزانہ مزمل اسلم نے مہم کا باقاعدہ افتتاح کیا

جمعرات 14 اگست 2025 17:32

پشاور (اُردو پوائنٹ اخبارتازہ ترین - اے پی پی۔ 14 اگست2025ء) اربن پلانٹیشن مہم کے سلسلے میں پشاور کے حیات آباد خوڑ اور اچینی خوڑ کے اطراف سات سات ہزار پودے لگانے کا آغاز ، صوبائی مشیر خزانہ مزمل اسلم نے مہم کا باقاعدہ افتتاح کیا۔اس موقع پر سیکرٹری جنگلات شاہد زمان، کمشنر پشاور ڈویژن ریاض خان محسود، ڈپٹی کمشنر پشاور سرمد سلیم اکرم، ڈائریکٹر جنرل پشاور ڈویلپمنٹ اتھارٹی شاہ فہد اور دیگر متعلقہ حکام بھی موجود تھے۔

کمشنر پشاور ڈویژن ریاض خان محسود نے مشیر خزانہ کو جاری شجر کاری مہم کے حوالے سے تفصیلی آگاہی دی۔ انہوں نے بتایا کہ اربن پلانٹیشن مہم کے تحت صوبائی دارالحکومت پشاور کے رنگ روڈ، جی ٹی روڈ سمیت اہم شاہراہوں کے اطراف اور سنٹر میڈیا پر 36 کلومیٹر تک تناور درخت اور پودے لگائے جا رہے ہیں، تمام تناور درختوں کی لمبائی 8 فٹ سے زیادہ رکھی گئی ہے، مہم کے دوران اب تک 11 کلومیٹر پر پودے اور درخت لگائے جاچکے ہیں، مہم میں عوام کو شریک کیا گیا ہے جس کے مثبت نتائج سامنے آئے ہیں۔

(جاری ہے)

بعد ازاں مشیر خزانہ کو اہم شاہراہوں پر لگا ئے گئے درختوں کا معائنہ کرایا گیا۔ مشیر خزانہ مزمل اسلم، سیکرٹری جنگلات شاہد زمان، کمشنر پشاور ڈویژن ریاض خان محسود، ڈپٹی کمشنر پشاور سرمد سلیم اکرم اور ڈائریکٹر جنرل پشاور ڈویلپمنٹ اتھارٹی شاہ فہد نے خوڑ کے اطراف پودے لگا کر مہم کا باقاعدہ آغاز کیا۔ مزمل اسلم نے جاری شجر کاری مہم پر اطمینان کا اظہار کرتے ہوئے لگائے گئے پودوں کی حفاظت اور مہم میں مزید تیزی لانے کےلیے ہدایت کی۔ انہوں نے توقع ظاہر کی کہ اربن پلانٹیشن مہم کی بدولت صوبائی دارالحکومت پشاور کی خوبصورتی میں اضافے سمیت ماحول کی صفائی اور موسمیاتی تبدیلی کے تدارک میں بھرپور مدد ملے گی۔