پاکستان کے یومِ آزادی پر ماحول دوست طرزِ زندگی کو اپنانا سب سے بڑا تحفہ ، ڈی جی سیپا

جمعرات 14 اگست 2025 17:40

کراچی (اُردو پوائنٹ اخبارتازہ ترین - اے پی پی۔ 14 اگست2025ء) 78ویں یومِ آزادی، معرکہ حق پر سندھ انوائرمنٹ پروٹیکشن ایجنسی کے ہیڈ آفس میں پرچم کشائی کی پروقار تقریب منعقد ہوئی جس میں ڈی جی سیپا وقار حسین پھلپوٹو کی قیادت میں سیپا کمپلیکس میں پرچم کشائی کی گئی۔جمعرات کو جاری اعلامیہ کے مطابق ڈی جی سیپاوقارحسین پھلپوٹونے کہا کہ پاکستان کے یومِ آزادی پر ماحول دوست طرزِ زندگی کو اپنانا سب سے بڑا تحفہ ہے۔

انہوں نے کہا کہ ماحولیاتی تحفظ ہر شہری کا قومی فریضہ ہے اور قدرتی وسائل کا تحفظ آنے والی نسلوں کے لیے قیمتی سرمایہ ہے۔اس موقع پر ڈی جی سیپاوقارحسین پھلپوٹو،ایڈیشنل سیکرٹری فاطمہ بشیر اور اسپیشل سیکرٹری آیان بھٹو نے پودے لگا کرسرسبزسندھ کے عزم کا اظہار کیا۔

(جاری ہے)

ڈی جی سیپانے کہا کہ ماحولیاتی شعور کو اجاگر کرنے کے لیے ہر قومی دن کو منفرد انداز میں مناتے ہیں، جشنِ آزادی کے موقع پر سیپا کمپلیکس کو دلکش سبز روشنیوں سے سجایا گیا، عمارت کی بیرونی و اندرونی آرائش کو خصوصی طور پر گرین تھیم میں ڈھالا گیا،رنگ برنگی لائٹس کی بہار اور سبز جھنڈیوں کی سجاوٹ نے ماحول کو مزید خوشنما بنا دیا۔

انہوں نے مزید کہا کہ سبز روشنی امید، خوشحالی اور پائیدار ترقی کی علامت ہے، عمارت کو سبز رنگ میں نہلا کر شجرکاری، فضائی آلودگی میں کمی اور قدرتی وسائل کے تحفظ کا پیغام دیا جا رہا ہے۔اس موقع پر شہریوں کی بڑی تعداد نے چراغاں کا مشاہدہ کیا اور گرین سندھ، کلین سندھ کے نعروں سے فضا ء گونجتی رہی۔