شاہد آفریدی سمیت کھیلوں کی شخصیات کو 23 مارچ کو قومی اعزازات دینے کا اعلان

کوہ پیما شہروز کاشف، سابق ویمن کرکٹر ثنا میر اور ڈسک تھرو میں حیدر علی کو ستارہ امتیاز سے نوازا جائے گا

ذیشان مہتاب جمعہ 15 اگست 2025 10:26

شاہد آفریدی سمیت کھیلوں کی شخصیات کو 23 مارچ کو قومی اعزازات دینے کا ..

لاہور (اردو پوائنٹ تازہ ترین اخبار ۔ 15 اگست 2025ء ) حکومت پاکستان نے اعلان کیا ہے کہ کھیلوں کے مختلف شعبوں میں نمایاں کارکردگی دکھانے والی معروف شخصیات کو 23 مارچ 2026ء کو یوم پاکستان کے موقع پر اعلیٰ ترین قومی اعزازات سے نوازا جائے گا۔

ان کھلاڑیوں میں پاکستان ٹیم کے سابق ٹیسٹ کپتان شاہد خان آفریدی، کوہ پیما شہروز کاشف، ملک محمد عطا (مرحوم) گھڑ سوار، سابق ویمن کرکٹر ثنا میر اور ڈسک تھرو میں حیدر علی کو ستارہ امتیاز سے نوازا جائے گا۔

(جاری ہے)

ان کے علاوہ اسکواش میں حمزہ خان، شوٹنگ میں محسن نواز اور ٹینس کے شعبے میں راشد ملک کو تمغہ امتیاز سے نوازا جائے گا جبکہ شاہ زیب رند کو کراٹے اور محمد سجاد کو کبڈی میں پرائیڈ آف پرفارمنس ایوارڈ سے نوازا جائے گا۔

واضح رہے کہ یہ اعزازات ان کھلاڑیوں اور شخصیات کو دیے جائیں گے جنہوں نے اپنی محنت، لگن اور شاندار کارکردگی سے اپنے اپنے کھیلوں میں ملک کا نام عالمی سطح پر روشن کیا۔