یورپی یونین اور جرمنی کی نئے اسرائیلی منصوبے کی مذمت

اسرائیلی آبادکاری کا منصوبہ بین الاقوامی قوانین کی خلاف ورزی ہے، بیان

جمعہ 15 اگست 2025 14:20

برسلز(اُردو پوائنٹ اخبارتازہ ترین - این این آئی۔ 15 اگست2025ء)یورپی یونین، جرمنی اور ترک وزارت خارجہ نے اسرائیل کے نئی بستیوں کی تعمیر کے منصوبے کو غیر قانونی قرار دیتے ہوئے اس کی تعمیر روکنے کا مطالبہ کر دیا۔ گزشتہ روز اسرائیلی وزیر خزانہ بذلیل سموٹرچ جانب سے مشرقی یروشلم کو مغربی کنارے سے الگ کرنے کی منظوری دی گئی، اسرائیلی وزیر خزانہ کے مطابق اس اقدام سے فلسطینی ریاست بننے کا خیال دفن کر دیا جائے گا۔

(جاری ہے)

اس فیصلے کے بعد یورپی یونین، جرمنی اور ترکیہ سمیت کئی ممالک نے اسرائیل سے اس منصوبے کو فوری طور پر روکنے کا مطالبہ کیا ہے۔یورپی یونین کے خارجہ پالیسی امور کے سربراہ کاجاکالاس نے کہا کہ اسرائیلی آبادکاری کا منصوبہ بین الاقوامی قوانین کی خلاف ورزی ہے، نئی بستیوں کا منصوبہ 2 ریاستی حل کو مزید کمزور کرتا ہے۔دوسری جانب جرمنی نے بھی اسرائیل سے مغربی کنارے میں بستیوں کی تعمیر روکنے کا مطالبہ کیا ہے۔ادھر ترک وزارت خارجہ کا کہنا تھا کہ اسرائیل کا یہ اقدام اقوام متحدہ کی قراردادوں کو نظر انداز کرتا ہے، آزاد فلسطینی ریاست کا قیام ہی دیرپاامن کا واحدراستہ ہے۔