پاکستان ایئرپورٹس اتھارٹی کا عوامی فیڈ بیک کیلئے ای کچہری کا انعقاد

جمعہ 15 اگست 2025 17:57

کراچی(اُردو پوائنٹ اخبارتازہ ترین - این این آئی۔ 15 اگست2025ء)پاکستان ایئرپورٹس اتھارٹی(پی اے ای)کی جانب سے جمعہ کو ای کچہری کا انعقاد کیا گیا، جس کی صدارت ڈپٹی ڈائریکٹر جنرل ورکس اینڈ ڈویلپمنٹ سمعیر سعید نے کی۔ اس موقع پر ایس کیو ایم ایس، انجینئرنگ سروسز، کمرشل اینڈ اسٹیٹ، ہیومن ریسورسز اور پلاننگ اینڈ ڈویلپمنٹ کے ڈائریکٹرز سمیت دیگر سینئر افسران بھی موجود تھے۔

ای کچہری پی اے اے کے آفیشل فیس بک پیج پر براہ راست نشر کی گئی، جس میں عوام نے ملک بھر کے ایئرپورٹس کی سہولیات اور خدمات کے حوالے سے اپنے مسائل، تجاویز اور رائے پیش کی۔عوام کی جانب سے مسافروں کی سہولت، ایئرپورٹس پر خوراک کے معیار، سامان کی ہینڈلنگ، پروازوں میں تاخیر اور ٹیکنالوجی اپ گریڈیشن سمیت متعدد امور پر گفتگو ہوئی۔

(جاری ہے)

اے ٹی ایم مشینز کی دستیابی، انٹرنیٹ سروس اور مسافروں کی کلیئرنس کے عمل سے متعلق معاملات بھی زیر بحث آئے۔

ڈپٹی ڈائریکٹر جنرل نے عوام کو یقین دلایا کہ ان کی آرا کو سنجیدگی سے لیا جاتا ہے اور متعلقہ محکموں کو ہدایت دی گئی ہے کہ وہ ایئرلائنز اور دیگر تمام تمام اسٹیک ہولڈرز کے ساتھ مل کر مسائل کے حل کے لیے اقدامات کریں۔ اجلاس میں رن وے اپ گریڈیشن، بنیادی ڈھانچے کی بہتری اور سہولیات میں اضافہ کے منصوبوں پر بھی بات چیت ہوئی۔انہوں نے مزید بتایا کہ ڈیرہ غازی خان ایئرپورٹ کا رن وے اپ گریڈ کیا جا رہا ہے تاکہ ای320 طیارے اتر سکیں۔

یہ منصوبہ دسمبر 2026 تک مکمل ہو جائے گا، جس کے بعد مسافروں کے اعداد و شمار سے ظاہر ہوتا ہے کہ ڈیرہ غازی خان ایئرپورٹ کا ایئرلائنز کے لیے مالی طور پر منافع بخش منزل بننے کا قوی امکان ہے۔ہیومن ریسورسز سے متعلق سوالات میں مخصوص عہدوں کے لیے انتخابی معیار، ملازمین کی فلاح و بہبود اور انٹرنشپ پروگرامز شامل تھے۔ کنٹریکٹرز کے معاہدوں کی خلاف ورزی اور تنخواہوں سے متعلق شکایات پر بھی نوٹ لیا گیا۔جناب سمعیر سعید نے تمام شرکا کا شکریہ ادا کرتے ہوئے کہا، "آپ کی رائے ہمیں آپ کی بہتر خدمت کرنے اور ایئرپورٹس کے تجربے کو بہتر بنانے میں مدد دیتی ہے۔"