بالائی خیبر پختونخوا، کشمیر، گلگت بلتستان ، پوٹھوہار اور شمال مشرقی پنجاب کے مقامی و برساتی ندی نالوں میں طغیانی کا خطرہ ہے، محکمہ موسمیات

جمعہ 15 اگست 2025 22:08

اسلام آباد (اُردو پوائنٹ اخبارتازہ ترین - اے پی پی۔ 15 اگست2025ء) محکمہ موسمیات نے متنبہ کیا ہے کہ آئندہ چوبیس گھنٹوں کے دوران بالائی خیبر پختونخوا، کشمیر، گلگت بلتستان ، خطہ پوٹھوہار اور شمال مشرقی پنجاب کے مقامی / برساتی ندی نالوں میں طغیانی کا خطرہ ہے۔

(جاری ہے)

اس دوران شدید بارشوں کے باعث خیبر پختونخوا کے پہاڑی علاقوں، گلگت بلتستان، مری، گلیات اور کشمیر میں لینڈ سلائیڈنگ کے باعث ٹریفک کی آمدورفت متاثر ہونے کا بھی خطرہ ہے۔

مزید برآں شدید بارشوں /آندھی /جھکڑ چلنے اور گرج چمک کے باعث روزمرہ کے معمولات متاثر ہونے کے علاوہ کمزور انفرا سٹرکچر کو نقصان کا اندیشہ ہے۔محکمہ موسمیات نے مسافروں اور سیاح حضرات کو ہدایت کی ہے کہ سفر کے دوران زیادہ محتاط رہیں اور موسمی حالات کے مطابق اپنے سفر کا انتظام کریں اور بارشوں کے دوران کسی بھی ناخوشگوار صورتحال سے بچنے کے لیے موسم کے بارے میں آگاہی حاصل کریں۔