سندھ ہائی کورٹ،نجی مال میں ایکسیلیٹر حادثے کے نتیجے میں بچے کی معذوری سے متعلق درخواست پرمزیدسماعت 2 ستمبر تک ملتوی

ہفتہ 16 اگست 2025 17:28

کراچی(اُردو پوائنٹ اخبارتازہ ترین - این این آئی۔ 16 اگست2025ء)سندھ ہائیکورٹ نے کلفٹن کے نجی مال میں ایکسیلیٹر حادثے کے نتیجے میں بچے کی معذوری سے متعلق نجی مال مالک اور انتظامیہ کو مقدمے سے خارج کرنے کیخلاف مدعی مقدمہ کی درخواست پرفریقین کے وکلا کوجواب جمع کروانے کے لئے مہلت دیتے ہوئے مزید سماعت 2 ستمبر تک ملتوی کردی۔ہفتہ کوسندھ ہائیکورٹ میں کلفٹن کے نجی مال میں ایکسیلیٹر حادثے کے نتیجے میں بچے کی معذوری سے متعلق نجی مال مالک اور انتظامیہ کو مقدمے سے خارج کرنے کیخلاف مدعی مقدمہ کی درخواست کی سماعت ہوئی۔

فریقین کے وکلا نے جواب جمع کروانے کے لئے مہلت کی استدعا کردی۔ عدالت نے درخواست کے مزید سماعت 2 ستمبر تک ملتوی کردی۔ درخواستگزار کے وکیل عثمان فاروق ایڈووکیٹ نے موقف دیا تھا کہ اپریل 2022 میں کلفٹن کے نجی مال میں ایکسیلیٹر حادثے میں پانچ سالہ بچہ امان زخمی ہوا تھا۔

(جاری ہے)

مال انتظامیہ کی غفلت اور فوری طبی امداد کی عدم فراہمی سے درخواست گزار کا بیٹا معذور ہوا۔

پولیس نے چالان میں عدم شواہد کی بنیاد پر مالک اور انتظامیہ کو مقدمے سے خارج کردیا۔جوڈیشل مجسٹریٹ نے مدعی مقدمہ کو سنے بغیر پولیس چالان کے منظوری دی۔ جوڈیشل مجسٹریٹ کا اقدام شفاف ٹرائل کے حق کی خلاف ورزی ہے۔ جوڈیشل مجسٹریٹ کا چالان منظوری کا فیصلہ کالعدم قرار دیا جائے۔ تمام ملزمان کو ٹرائل کا سامنا کرنے کا حکم دیا جائے۔