راولپنڈی میں اب تک ڈینگی کے 85 کیسز رپورٹ

مری میں 1747 گھروں سے ڈینگی لاروا برآمد ہوا ہے، رپورٹ

ہفتہ 16 اگست 2025 23:40

راولپنڈی (اُردو پوائنٹ اخبارتازہ ترین - این این آئی۔ 16 اگست2025ء)راولپنڈی ڈویژن میں 2025 میں اب تک ڈینگی کے 85 کیسز رپورٹ ہوچکے ہیں۔محکمہ صحت کے مطابق گزشتہ سال کے آج کے دن تک ڈینگی کیسز کی تعداد 85 کے برابر ہوچکی ہے۔راولپنڈی میں 35، مری میں 42 کیسز رپورٹ ہوئے ہیں ،مری میں ڈینگی بے قابو ہونے لگا ہے اور مریضوں کی تعداد میں اضافہ دیکھنے میں آیا ہے۔

مزید برآں اٹک میں 4، چکوال میں 3، جہلم میں 1 ڈینگی مریض سامنے آئے ہیں۔

(جاری ہے)

سال 2024 میں ڈویڑن بھر میں 6869 کیسز رپورٹ ہوئے تھے۔ڈویژن میں 2025 کے دوران اب تک ڈینگی سے کوئی موت رپورٹ نہیں ہوئی ہے جبکہ ہسپتالوں میں ڈینگی کے 9614 مشتبہ مریض رپورٹ ہوچکے ہیں۔311 مریضوں میں ڈینگی کی تصدیق اور 15 مریضوں کو داخل کیا گیا ، مری میں 10 ڈینگی مریض ہسپتالوں میں داخل کیے گئے ہیں۔محکمہ صحت کے مطابق لاروا کی موجودگی پر راولپنڈی میں 2440 ایف آئی آرز درج، 1112 مقامات سیل، 2819 چالان اور 4 کروڑ روپے سے زائد جرمانہ عائد کیا جاچکا ہے۔دوسری جانب مری میں 43 ایف آئی آرز 189 سیلنگ اور 730000 روپے جرمانہ عائد کیا جاچکا ہے۔