ریجنل ٹرانسپورٹ اتھارٹی نے غیر قانونی رکشوں کے خلاف کارروائی کرتے ہوئے 9 رکشے بند کر دیئے

ہفتہ 16 اگست 2025 20:10

کوئٹہ (اُردو پوائنٹ اخبارتازہ ترین - اے پی پی۔ 16 اگست2025ء) ریجنل ٹرانسپورٹ اتھارٹی نے غیر قانونی رکشوں کے خلاف کارروائی کرتے ہوئے 9 غیر قانونی رکشے بند کر دیئے۔ تفصیلات کے مطابق صوبائی حکومت کے احکامات اور ہائی کورٹ بلوچستان کے حکم پر سیکرٹری ریجنل ٹرانسپورٹ اتھارٹی کوئٹہ کی زیر نگرانی شہر میں غیر قانونی رکشوں کے خلاف کارروائیاں جاری ہیں۔

سیکرٹری ریجنل ٹرانسپورٹ اتھارٹی کوئٹہ ڈویژن ظہور احمد بلوچ نے ایئرپورٹ روڈ اور بی اے مال کے علاقے میں کارروائی کے دوران 9 غیر قانونی رکشے پکڑ کر بند کر دیے ۔

(جاری ہے)

اس موقع پر ایس پی صدر سرکل عاصم شاہ، ٹریفک پولیس اور آر ٹی اے کا عملہ بھی موجود تھا۔ کارروائی کے دوران رکشہ ڈرائیوروں کے کاغذات، پرمٹ اور ڈرائیونگ لائسنس کی جانچ پڑتال کی گئی۔

سیکرٹری ریجنل ٹرانسپورٹ اتھارٹی کوئٹہ نے اس موقع پر کہا کہ شہر میں غیر قانونی رکشوں کے خلاف کریک ڈاؤن روزانہ کی بنیاد پر جاری ہے لہٰذا تمام رکشہ مالکان اپنے کاغذات اور اصل پرمٹ ہمراہ رکھیں تاکہ دوران چیکنگ پیش کیے جا سکیں۔ انہوں نے کہا کہ شہر میں ٹریفک کے نظام کو بہتر بنانے کے لیے یہ کارروائی ناگزیر ہے کیونکہ غیر قانونی رکشوں کی وجہ سے رش اور ٹریفک جام کی صورتحال پیدا ہوتی ہے۔