امریکی ناظم الامور نیٹلی بیکر اور بین الاقوامی کرکٹر حارث رف کا جہلم میں سماعت سے محروم بچوں کے سکول کا دورہ

ہفتہ 16 اگست 2025 22:05

اسلام آباد(اُردو پوائنٹ اخبارتازہ ترین - این این آئی۔ 16 اگست2025ء) وزیر مملکت برائے خزانہ و ریلوے بلال اظہر کیانی کی دعوت پر امریکی سفارت خانے کی ناظم الامور نیٹلی بیکر نے عبدالرزاق ویلفیئر ٹرسٹ ڈیف ریچ سکول جہلم کا دورہ کیا۔ان کے ہمراہ لاہور قلندرز کے سی ای او عاطف رانا، ثمین رانا، اور بین الاقوامی کرکٹر حارث رف بھی تھے۔

(جاری ہے)

اس موقع پر، سماعت سے محروم بچوں نے اشاروں کی زبان میں نیٹلی بیکر کا خیرمقدم کیا،جس پر انہوں نے بھی اشاروں سے بچوں کا شکریہ ادا کیا۔

سکول کے دورے کے دوران، بچوں کے والدین کی ایک بڑی تعداد بھی موجود تھی۔بلال اظہر کیانی نے تمام معزز مہمانوں کا ان کی آمد پر خصوصی شکریہ ادا کیا۔ وزیر مملکت بلال اظہر کیانی کی فیملی کی جانب سے قائم کردہ یہ فلاحی ادارہ برسوں سے سماعت سے محروم بچوں کو مفت علاج، تعلیم اور تربیت فراہم کر رہا ہے۔