ایران پر اقوام متحدہ کی پابندیاں دوبارہ نافذ ہونے سے کیا ہو گا؟

اسلام آباد (اُردو پوائنٹ ۔ DW اردو۔ 05 اکتوبر 2025ء) ایران کو 2015 کے جوہری معاہدے کے اسنیپ بیک میکنزم کے تحت ایک بار پھر سے اپنے ہتھیاروں کی تجارت، تیل کی برآمدات، بین الاقوامی بینکنگ اور بہت سی دیگر اشیا پر بین الاقوامی پابندیوں کا سامنا ہے۔

جوہری معاہدہ ایران، امریکہ، فرانس، جرمنی، برطانیہ، روس اور چین کے علاوہ دیگر یورپی یونین کے درمیان ہوا تھا اور ایران کے جوہری پروگرام کو روکنے کے بدلے میں تہران کو اقتصادی ریلیف فراہم کیا گیا تھا۔

تاہم جب امریکہ نے یکطرفہ طور پر معاہدے سے دستبرداری اختیار کر لی اور ڈونلڈ ٹرمپ کی انتظامیہ نے 2018 میں دوبارہ پابندیاں عائد کیں، تو اس معاہدے کے دیگر شرکاء نے اسے بچانے اور پابندیوں میں ریلیف کو برقرار رکھنے کے لیے کام کیا۔

(جاری ہے)

رواں برس اگست میں برطانیہ، فرانس اور جرمنی نے معاہدے کی شق "اسنیپ بیک میکانزم" کو متحرک کیا۔

ایران کو 'مکمل، گھٹن والی پابندیوں' کا سامنا

چین اور روس کی طرف سے اس عمل میں تاخیر کی کوششوں کے باوجود، 30 دن کی اسنیپ بیک رعایتی مدت اسی ہفتے ختم ہو گئی، اس کا مطلب یہ ہے کہ ایران پر سے پہلے سے اٹھائی گئی تمام پابندیاں خود بخود بحال ہو گئی ہیں۔

بین الاقوامی سلامتی کے تجزیہ کار شاہین مدرس نے ڈی ڈبلیو کو بتایا، "یہ صرف پابندیوں کا ایک اور دور نہیں ہے؛ یہ ایک مکمل، گھٹن والی پابندیوں کی واپسی ہے جس کا ایران کو برسوں میں سامنا نہیں کرنا پڑا۔"

انہوں نے مزید کہا، "اس کا مطلب ہے کہ اب بینکنگ چینلز مسدود ہیں، تیل کی برآمدات کا گلا گھونٹ دیا گیا ہے، اور یہاں تک کہ بنیادی تجارت بھی پابندیوں کے جال میں الجھ گئی ہے۔

ان کے مطابق، تعزیری اقدامات ایران کی کرنسی کے خاتمے کا باعث بنیں گے، جس سے درآمدات تکلیف دہ طور پر مہنگی ہو جائیں گی۔ نوکریاں ختم ہو جائیں گی اور جو اب بھی کام کر رہے ہیں، مہنگائی کی وجہ سے ان کی اجرت ختم ہو جائے گی۔

معاشی ماہرین کے پاس اس کے لیے ایک اصطلاح ہے 'مسیری انڈیکس،' یعنی بے روزگاری اور افراط زر کا مجموعہ اور ایران میں یہ پہلے ہی سے کافی زیادہ ہے۔

جرمن-ایرانی ماہر طبیعیات اور جوہری پالیسی کے ماہر بہروز بیات نے ڈی ڈبلیو کو بتایا کہ عوام کو دو محاذوں پر بحران کا خمیازہ بھگتنا پڑے گا۔

"پہلے، وہ براہ راست متاثر ہوں گے، خاص طور پر متوسط ​​طبقہ، جو کسی بھی جمہوریت میں ریڑھ کی ہڈی کی حیثیت رکھتے ہیں۔

کیا سفارت کاری تبدیلی لاسکتی ہے؟

یورپی حکام اور امریکی وزیر خارجہ مارکو روبیو نے پابندیوں کی واپسی کے بعد ایران کے ساتھ سفارت کاری اور مذاکرات جاری رکھنے کے لیے اپنی آمادگی کا اعادہ کیا ہے۔

تاہم، حال ہی میں آیت اللہ علی خامنہ ای کی جانب سے امریکہ کے ساتھ مذاکرات کے خیال کو "سراسر ڈیڈ اینڈ" قرار دے کر مسترد کیا جا چکا ہے اور ایران کے اعلیٰ حکام بھی انہیں جذبات کی بازگشت کرتے ہیں، اس لحاظ سے سفارتی راستے بہت تنگ نظر آتے ہیں۔

سکورٹی تجزیہ کار شاہین مدرس نے کہا کہ "تہران کے علماء جانتے ہیں کہ دنیا جوہری اور بیلسٹک میزائل دونوں پروگراموں کو مکمل طور پر ختم کرنے سے کم کسی چیز پر اکتفا نہیں کرے گی۔

انہوں نے مزید کہا، "اگر وہ ان پروگراموں کو رضاکارانہ طور پر روک دیتے ہیں، تو وہ ایک ایسے گروہ کی وفاداری سے محروم ہو جائیں گے جو اب بھی انہیں برقرار رکھے ہوئے ہے: وہ چھوٹی لیکن طاقتور نظریاتی اقلیت جو ملک کے اندر جبر کو نافذ کرتی ہے۔"

ان کے کے مطابق، حکومت کی قیادت اپنی بنیاد کو خوش رکھنے کے لیے ہر چیز کو خطرے میں ڈالے گی، یہاں تک کہ جنگ بھی چھیڑ دے گی۔

انہوں نے مزید کہا، "وہ خیال کرتے ہیں کہ اگر مغربی طاقتیں حملہ کرتی ہیں، تو وہ خود نہیں بلکہ حملہ آور بیرونی ہوں گے، جو جوہری تنصیبات اور میزائل اڈوں کو تباہ کرتے ہیں۔ اس طرح، حکومت یہ دعویٰ کر سکتی ہے کہ اس نے کبھی ہار نہیں مانی اور یہ کہ غیر ملکی جارحیت کی وجہ سے وہ اس پوزیشن میں آنے پر مجبور ہوئے۔"

ان کا دعویٰ ہے کہ حکومت کے رہنما ٹوٹے ہوئے اور ناکام ایران کو بھی قبول کرنے کے لیے تیار ہوں گے، جب تک کہ وہ اس پر حکومت کر سکیں۔

کیا امریکہ حکومت کی تبدیلی کا خواہاں ہے؟

ایران میں یہ خدشات بھی بڑھتے جا رہے ہیں کہ امریکہ پابندیوں کی واپسی اور اسرائیل کے ساتھ حالیہ 12 روزہ جنگ کی وجہ سے اسلام پسندوں کے توازن کو چھوڑ کر تہران میں حکومت کی تبدیلی پر زور دے رہا ہے۔

ان خدشات کو گزشتہ ہفتے ترکی میں امریکی سفیر ٹام بیرک کے تبصروں سے تقویت ملی، جب انہوں نے ایران اور حزب اللہ کو واشنگٹن کا دشمن قرار دیا اور کہا کہ امریکہ کو "ان سانپوں کے سر کاٹ دینے" کی ضرورت ہے۔

لیکن ایرانی تجزیہ کار شاہین مدرس کو یقین نہیں ہے کہ اس نئی مہم کی کامیابی کے لیے امریکہ کی خارجہ پالیسی کافی ہے۔

انہوں نے کہا، "تاریخ بتاتی ہے کہ حکومت کی تبدیلی کبھی بھی صرف بیان بازی کا معاملہ نہیں ہوتی۔ اس کے لیے سیاسی ارادے، وسائل اور اس کے بعد آنے والے ویژن کی ضرورت ہوتی ہے۔"

ان کا مزید کہنا ہے، "حکومت کی تبدیلی کو ایک حقیقی مقصد بنانے کے لیے، اسے ایک اجتماعی فیصلے کی طرف بڑھنا چاہیے، جو نہ صرف افراد بلکہ وائٹ ہاؤس، کانگریس، اور امریکہ کی سکیورٹی اسٹیبلشمنٹ کے لیے بھی قابل قبول ہو اور بیرون ملک اتحادیوں کے ذریعے اسے برقرار بھی رکھا جائے۔

انہوں نے مزید کہا کہ واشنگٹن حکومت کی تبدیلی کے لیے دباؤ ڈالنے کے لیے، امریکی رہنماؤں اور اداروں کو ایک ایسے مشترکہ مقصد کے لیے اس کا عزم کرنا ہو گا کہ وہ "اس کے بعد ہونے والے نتائج کے ساتھ زندگی گزارنے کے لیے تیار رہیں"۔

ان کے مطابق، "اس کے بغیر، جو ہم دیکھتے ہیں وہ دباؤ ہے، تبدیلی نہیں: حکومت کو کمزور کرنے کے لیے پابندیاں، اس کے پروگراموں کو سست کرنے کے لیے خفیہ اقدامات، اس کی رسائی کو کم کرنے کے لیے سفارتی تنہائی۔

ایران کے لیے آگے کا راستہ کیا ہے؟

تہران خود کو ایک بار پھر الگ تھلگ پا رہا ہے، تاہم ایسا لگتا ہے کہ ایرانی حکومت اپنے سخت گیر لوگوں کے طے کردہ راستے پر گامزن ہے۔

اسنیپ بیک میکانزم کے فعال ہونے کے ساتھ، ایران ایک بار پھر اقوام متحدہ کے چارٹر کے باب ہفتم کے تحت آ گیا ہے، جس کا مطلب ہے کہ ملک بین الاقوامی امن اور سلامتی کے لیے خطرہ ہے۔

ایران کے اندر، بہت سے لوگ اس بارے میں بات بھی کر رہے ہیں۔ اقوام متحدہ کے اس باب کا آرٹیکل 42 اس جانب بھی اشارہ کرتا ہے کہ اگر ایسے اقدامات "ناکافی ثابت ہوئے" تو سلامتی کونسل مزید آگے بڑھ سکتی ہے اور "اقوام متحدہ کے اراکین کی فضائی، سمندری یا زمینی افواج کے ذریعے اس کے خلاف آپریشن" سمیت مزید کارروائیاں بھی کی جاسکتی ہیں۔

جرمن-ایرانی ماہر طبعیات نے کہا، "باب ہفتم کے تحت قراردادیں اور ایران کی جگہ کا تعین ابھی تک جنگ کا جواز نہیں پیش کرتا ہے۔"

انہوں نے بتایا کہ "خاص طور پر، آرٹیکل 41 فوجی کارروائی کی اجازت نہیں دیتا۔ یہ آرٹیکل 42 ہے جو طاقت کے استعمال کی اجازت دیتا ہے۔ تاہم، دنیا ہمیشہ قانونی فریم ورک کے مطابق سختی سے کام نہیں کرتی۔"

ص ز/ ج ا (نیلوفر غلامی)