سوات میں سیلاب سے تباہی، اسکول پرنسپل کی حاضر دماغی نے 936 بچوں کی جانیں بچالیں

سعیداحمدکی حکومت سے سیلاب کے باعث متاثر ہو نیوالے سکول کی فوری بحالی کیلئے اقدامات اٹھانے کی اپیل

اتوار 17 اگست 2025 22:00

سوات(اُردو پوائنٹ اخبارتازہ ترین - این این آئی۔ 17 اگست2025ء)سوات کے علاقے منگلور میں سیلاب سے گورنمنٹ پرائمری سکول بھی شدید متاثر ہوا تاہم سکول پرنسپل کی حاضر دماغی کے باعث سیکڑوں بچوں کی جانیں بچ گئیں۔گورنمنٹ پرائمری سکول منگلور کے ہیڈ ماسٹر سعید احمد نے گفتگو کرتے ہو ئے بتایاکہ جس دن سیلاب آیا اس دن صبح قریبی ندی میں اچانک پانی کے بہاؤ میں اضافہ ہوگیا۔

(جاری ہے)

صورتحال کو دیکھتے ہوئے انہوں نے تمام اساتذہ کو حکم دیا کہ بچوں کو چھٹی دی جائے، اس دوران پانی سکول میں بھی داخل ہوا اور سکول کی بیرونی دیوار گرگئی۔تاہم ہیڈ ماسٹر کے بروقت ایکشن سے اسکول میں زیر تعلیم تمام 936بچوں کو محفوظ مقام پر منتقل کردیا گیا۔سعید احمد نے کہا کہ صرف 5منٹ کے اندر پورا کول سیلاب سے متاثر ہوا اور تمام کلاس رومز اور دفاتر میں پانی بھر گیا تاہم کو ئی جانی نقصان نہیں ہوا۔ انہوں نے حکومت سے اپیل کی کہ سیلاب کے باعث متاثر ہو نے والے سکول کی فوری بحالی کے لیے اقدامات اٹھائے جائیں۔