جھل مگسی میں تیل و گیس کا بڑا منصوبہ آپریشنل، پیداوار شروع ہوگئی

جھل مگسی سے حاصل ہونے والی گیس کو ایس ایس جی سی ایل کی مین پائپ لائن کے نیٹ ورک میں شامل کردیا گیا

Sajid Ali ساجد علی پیر 18 اگست 2025 12:23

جھل مگسی میں تیل و گیس کا بڑا منصوبہ آپریشنل، پیداوار شروع ہوگئی
کوئٹہ ( اُردو پوائنٹ اخبارتازہ ترین۔ 18 اگست 2025ء ) صوبہ بلوچستان کے ضلع جھل مگسی میں تیل و گیس کا بڑا منصوبہ آپریشنل ہونے کے بعد پیداوار شروع ہوگئی۔ تفصیلات کے مطابق او جی ڈی سی ایل نے بلوچستان کے ضلع جھل مگسی میں گیس کا بڑا جھل مگسی ڈویلپمنٹ پراجیکٹ کامیابی سے مکمل کر لیا اور منصوبہ آپریشنل ہو نے کے بعد پیداوار بھی شروع ہوچکی ہے۔ ترجمان او جی ڈی سی ایل نے بتایا کہ وزیراعظم شہباز شریف کی ہدایات پر یہ منصوبہ فاسٹ ٹریک بنیادوں پر مکمل ہوا، او جی ڈی سی ایل نے سٹاک ایکسچینج کو خط لکھ کر جھل مگسی ڈویلپمنٹ پراجیکٹ کی کامیاب تکمیل اور افتتاح کا اعلان کردیا، جھل مگسی پراجیکٹ سے 14 ملین معکب فٹ یومیہ گیس اور 45 بیرل یومیہ تیل کی پیداوار حاصل ہو رہی ہے، جھل مگسی سے حاصل ہونے والی گیس کو ایس ایس جی سی ایل کی مین پائپ لائن کے نیٹ ورک میں شامل کردیا گیا ہے۔

(جاری ہے)

ترجمان کا کہنا ہے کہ او جی ڈی سی ایل نے یہ منصوبہ فروری 2024ء میں گورنمنٹ کے مراعاتی پیکج کی منظوری کے بعد شروع کیا تھا، جھل مگسی تیل و گیس کے منصوبے میں او جی ڈی سی ایل بطور آپریٹر 56 فیصد، پی او ایل 24 فیصد اور جی ایچ پی ایل 20 فیصد کی شراکت دار ہیں جب کہ او جی ڈی سی ایل نے سی ایس آر فنڈ سے جھل مگسی میں سکول، ہیلتھ کیئر سہولت مراکز اور کم آمدنی بے گھر لوگوں کے لیے 84 ماڈل مکانات بھی تعمیر کیے ہیں۔

ترجمان نے بتایا کہ او جی ڈی سی ایل کی طرف سے بلوچستان کے مقامی نوجوانوں کے لیے سکالرشپس اور نیووٹیک کے ذریعے فنی تربیت کے مواقع فراہم کیے گئے، او جی ڈی سی ایل نے صحت کی سہولتوں کے لیے ایمبولینسز، فری آئی کیمپس اور 800 خاندانوں کو راشن بیگز تقسیم کیے، جھل مگسی میں صاف پانی کی فراہمی کے لیے 2 آر او پلانٹس اور بے شمار واٹر ٹینکس بھی نصب کیے گئے ہیں۔