گیس کا بڑا جھل مگسی ڈویلپمنٹ پراجیکٹ کامیابی سے مکمل‘ تیل و گیس کا منصوبہ آپریشنل ہو گیا

پیر 18 اگست 2025 14:54

جھل مگسی (اُردو پوائنٹ اخبارتازہ ترین - این این آئی۔ 18 اگست2025ء)بلوچستان کے ضلع جھل مگسی میں تیل و گیس کا اہم منصوبہ آپریشنل ہو گیا۔او جی ڈی سی ایل نے بلوچستان کے ضلع جھل مگسی میں گیس کا بڑا جھل مگسی ڈویلپمنٹ پراجیکٹ کامیابی سے مکمل کر لیا۔ترجمان او جی ڈی سی ایل نے کہا کہ منصوبہ وزیراعظم شہباز شریف کی ہدایات پر فاسٹ ٹریک بنیادوں پر مکمل ہوا۔

او جی ڈی سی ایل نے اسٹاک ایکسچینج کو خط لکھ کر جھل مگسی ڈویلپمنٹ پراجیکٹ کی کامیاب تکمیل اور افتتاح کا اعلان کردیا۔ترجمان کے مطابق جھل مگسی پراجیکٹ سے 14 ملین معکب فٹ یومیہ گیس اور 45 بیرل یومیہ تیل کی پیداوار حاصل ہو رہی ہے۔جھل مگسی سے حاصل ہونے والی گیس کو ایس ایس جی سی ایل کی مین پائپ لائن کے نیٹ ورک میں شامل کر دیا گیا ہے۔

(جاری ہے)

او جی ڈی سی ایل نے یہ منصوبہ فروری 2024 میں گورنمنٹ کے مراعاتی پیکج کی منظوری کے بعد شروع کیا تھا۔

جھل مگسی تیل و گیس کے منصوبے میں او جی ڈی سی ایل بطور آپریٹر 56 فیصد، پی او ایل 24 فیصد اور جی ایچ پی ایل 20 فیصد کی شراکت دار ہیں۔ترجمان کے مطابق او جی ڈی سی ایل نے سی ایس آر فنڈ سے جھل مگسی میں اسکول، ہیلتھ کیئر سہولت مراکز اور کم آمدنی بے گھر لوگوں کے لئے 84 ماڈل مکانات تعمیر کیے۔ او جی ڈی سی ایل کی طرف سے بلوچستان کے مقامی نوجوانوں کے لیے اسکالرشپس اور نیووٹیک کے ذریعے فنی تربیت کے مواقع فراہم کئے گئے۔او جی ڈی سی ایل نے صحت کی سہولتوں کے لیے ایمبولینسز، فری آئی کیمپس اور 800 خاندانوں کو راشن بیگز تقسیم کیے۔ جھل مگسی میں صاف پانی کی فراہمی کے لیے 2 آر او پلانٹس اور بے شمار واٹر ٹینکس بھی نصب کیے گئے۔