پنجاب حکومت کا شہروں کی جدید تعمیروترقی کیلئے جاپان کے تجربات سے سیکھنے کا فیصلہ

یوکوہاما اور صوبہ پنجاب میں جدید ترقیاتی نظام اور مختلف شعبوں میں ’سٹی ٹوسٹی‘ تعاون پراتفاق، پنجاب میں سڑکوں اور عمارتوں کا تعمیراتی معیار جاپان کے برابر لانے پر بات چیت ہوئی۔ وزیراعلیٰ مریم نواز کا دورہ جاپان

ثنااللہ ناگرہ پیر 18 اگست 2025 19:06

پنجاب حکومت کا شہروں کی جدید تعمیروترقی کیلئے جاپان کے تجربات سے سیکھنے ..

لاہور ( اردوپوائنٹ اخبار تازہ ترین۔ آئی پی اے ۔ 18 اگست 2025ء ) پنجاب حکومت نے شہروں کی جدید تعمیروترقی کیلئے جاپان کے تجربات سے سیکھنے کا فیصلہ کرلیا ہے، جس کے تحت یوکوہاما اور صوبہ پنجاب میں جدید ترقیاتی نظام اور مختلف شعبوں میں ’سٹی ٹوسٹی‘ تعاون پر اتفاق، پنجاب میں سڑکوں اور عمارتوں کا تعمیراتی معیار جاپان کے برابر لانے پر بات چیت ہوئی۔

تفصیلات کے مطابق وزیراعلیٰ پنجاب مریم نواز شریف نے ماحولیاتی آلودگی کے خاتمے اور شہروں کی جدید خطوط پر تعمیر وترقی کے لیے جاپان کے تجربات سے سیکھنے کا فیصلہ کیا۔ وزیراعلی مریم نواز شریف نے جاپان کے تجارتی، معاشی اور ثقافتی مرکز’یوکو ہاما‘ (Yokohama ) شہر کا دورہ کیا۔ یوکوہاما اور صوبہ پنجاب میں ماحولیات اور شہروں کو جدید ترقیاتی نظام فراہم کرنے سمیت مختلف شعبوں میں ’سٹی ٹو سٹی‘ تعاون پر اتفاق کیا گیا۔

(جاری ہے)

وزیر اعلی پنجاب مریم نواز شریف اور ان کے وفد کو یوکو ہاما کے ٹاؤن ہال میں اربن ڈویلپمنٹ پر بریفنگ دی گئی۔ پنجاب میں سڑکوں اور عمارتوں کا تعمیراتی معیار جاپان کے برابر لانے پر بات چیت کی گئی۔ راوی اربن ڈویلپمنٹ اتھارٹی (روڈا) اور یوکو ہاما میں تعاون کے مختلف امکانات پر غور کیا گیا۔ لاہور اسلام آباد کے درمیان تیز رفتار ٹرین چلانے اور ریلوے اپ گریڈیشن میں تعاون کے امکانات کا بھی جائزہ لیا گیا۔

وزیر اعلیٰ مریم نواز شریف نے جدید ترین جاپانی چیئر لفٹ اور ائیر کیبن منصوبوں کا جائزہ لیا۔ ’کن ہن‘ ریجن میں واقع ٹوکیو، کا واساکی اور یوکو ہاما کے تین شہر جاپان کا صنعتی زون کہلاتے ہیں۔ ’یوکوہاما‘ آبادی کے لحاظ سے جاپان کا دوسرا بڑا شہر ہے۔ مئی 2025 میں ایشیائی ترقیاتی بنک کی سالانہ کانفرنس’یوکوہاما‘ کو پورے ایشیا میں ماحولیاتی بہتری کے حوالے سے سب سے ترقی یافتہ شہر قرار دے چکی ہے۔وزیراعلی مریم نواز جاپان کے پانچ دن کے دورے پر ہیں۔