وادی نیلم میں سیاحوں کی گاڑی کو حادثہ ، میاں بیوی سمیت 5 افراد جاں بحق

پیر 18 اگست 2025 20:40

مظفر آباد (اُردو پوائنٹ اخبارتازہ ترین - اے پی پی۔ 18 اگست2025ء) وادی نیلم کے علاقے شنڈاس میں سیاحوں کی گاڑی المناک حادثے کا شکار ہو گئی جس کے نتیجے میں خاتون سمیت 5 افراد جان کی بازی ہار گئے جبکہ ایک کمسن بچی زخمی ہو گئی۔پولیس کنٹرول روم کے مطابق کراچی کی فیملی ، جو تاؤبٹ سیر کو نکلی تھی ، کی شنڈاس کے مقام پر گاڑی حادثے کا شکار ہوئی۔

(جاری ہے)

حادثے میں ڈاکٹر ذیشان شاہد اور ان کی بیگم جاں بحق ہوگئے جبکہ ان کی شیر خوار بچی معجزاتی طور پر بچ گئی ۔ گاڑی کا ڈرائیور اور کنڈیکٹر بھی موقع پر جاں بحق ہو گئے -ریسکیو حکام کے مطابق حادثہ شنڈاس کے مقام پر سڑک کی خستہ حالی کے باعث پیش آیا۔ گاڑی میں ڈرائیور سمیت 6 افراد سوار تھے۔ جاں بحق افراد کی لاشوں کو اے ڈی ایس ہلمت منتقل کر دیا گیا ہے۔