پنجاب میں الیکٹرک گاڑیوں اور بائیکس کیلئے بیٹری چارجنگ انفراسٹرکچر قائم کرنے کا فیصلہ

الیکٹرک گاڑیوں کے فروغ کیلئے ہنڈا کے تعاون کا خیرمقدم کریں گے، حکومت پنجاب اور ہنڈا کمپنی کے درمیان سٹریٹجک تعاون بڑھانے، الیکٹرک گاڑیوں کی مقامی پیداوار کے امور پرتبادلہ خیال، وزیراعلیٰ مریم نواز کا دورہ جاپان

ثنااللہ ناگرہ منگل 19 اگست 2025 18:58

پنجاب میں الیکٹرک گاڑیوں اور بائیکس کیلئے بیٹری چارجنگ انفراسٹرکچر ..

لاہور ( اردوپوائنٹ اخبار تازہ ترین۔ آئی پی اے ۔ 19 اگست 2025ء ) وزیراعلیٰ پنجاب مریم نوازشریف نے ٹوکیو میں ہنڈا کمپنی کے ہیڈ کوارٹر کا دورہ کیا۔ وزیراعلیٰ مریم نوازشریف نے ہنڈ ا کمپنی ایگزیکٹو وائس پریزیڈنٹ نوریا کایہارا سے ملاقات کی۔ حکومت پنجاب اور ہنڈا کمپنی کے درمیان اسٹریٹجک تعاون بڑھانے، الیکٹرک گاڑیوں کی مقامی پیداوار اور اسمبلنگ کے امور پر تبادلہ خیال کیا۔

نوجوانوں کو اس شعبے میں ہنرمند بنانے کے لئے جاپان بالخصوص ہنڈا کے تجربات سے فائدہ اٹھانے پر اتفاق کیا۔وزیراعلی مریم نواز نے حکومت پنجاب کے 1500 الیکٹرک بسوں کے لئے نجی شعبے کے اشتراک سے ای وی ڈپو قائم کرنے سے متعلق آگاہ کیا۔وزیراعلیٰ مریم نوازشریف نے گفتگو کرتے ہوئے کہاکہ پنجاب میں بجلی سے چلنے والی گاڑیوں کے کلچر کے فروغ کے لئے ہنڈا کے تعاون کو سراہا جائے گا۔

(جاری ہے)

انہوں نے کہا کہ پنجاب میں الیکٹرک گاڑیوں کی سب سے بڑی مارکیٹ بننے کا پوٹینشل ہے۔ پنجاب سرمایہ کاری کے بہترین مواقع فراہم کرتا ہے، سکلڈ لیبر کے ساتھ الیکٹرک گاڑیوں کی اسمبلنگ اور مینوفیکچرنگ کے لئے آئیڈیل مقام ہے۔ وزیراعلیٰ مریم نوازشریف نے کہا کہ پنجاب کے شہری اور نیم شہری علاقوں میں الیکٹرک گاڑیوں اور بائیکس کے لئے بیٹری چارجنگ انفراسٹرکچر قائم کرنا چاہتے ہیں۔

سٹیٹ آف دی آرٹ وہیکل ٹیسٹنگ لیب کے لئے ہنڈا کمپنی کے اشتراک کا خیر مقدم کریں گے۔ پنجاب حکومت غیر ملکی سرمایہ کاروں کو بہترین مراعات فراہم کر رہی ہے۔ وزیراعلیٰ مریم نوازشریف نے بتایا کہ لاہور اور راولپنڈی کے درمیان ہائی سپیڈٹرین کے ذریعے نئے دور کا آغاز کریں گے۔ راولپنڈی سے مری کے لئے ٹورسٹ گلاس ٹرین پراجیکٹ سے سیاحت کو فروغ ملے گا۔ حادثات میں کمی کیلئے وہیکل سیفٹی سٹینڈرڈ میں بہتری لانا چاہتے ہیں۔ ہنڈا کمپنی کے نائب صدر نے وزیراعلی پنجاب مریم نواز شریف کا خیرمقدم کیا اور صوبے کی ترقی کے وژن اور جذبے کو سراہا۔