انسانی اسمگلرز کیساتھ گٹھ جوڑ پر 3 سال میں ایف آئی اے کے 51 ملازمین برطرف

یونان کشتی حادثے میں پاکستانی شہریوں کی اموات کے بعد 41 ایف آئی اے اہلکار برطرف کیے گئے تھے

منگل 19 اگست 2025 22:49

اسلام آباد (اُردو پوائنٹ اخبارتازہ ترین - این این آئی۔ 19 اگست2025ء)انسانی اسمگلروں کے ساتھ گٹھ جوڑ پر 3 سال کے دوران وفاقی تحقیقاتی ادارے (ایف آئی ای) کے 51 ملازمین کو برطرف اور 56 اہلکاروں کو گرفتار کیا گیا جبکہ اسی عرصے میں انسانی اسمگلنگ میں ملوث ایف آئی اے اہلکاروں کے خلاف 21 مقدمات درج کیے گئے۔وزارت داخلہ نے سینیٹ میں تحریری جواب جمع کرا دیا ہے جس میں ایوان بالا کو آگاہ کیا گیا ہے گزشتہ 3 برسوں میں انسانی اسمگلنگ پر ایف آئی اے کے اہلکاروں کے خلاف 21 مقدمات درج کیے گئے ہیں۔

اسی عرصے میں ایف آئی اے کے 56 اہلکار گرفتار ہوئے، اس وقت 16 مقدمات زیر سماعت ہیں۔سینیٹ کو آگاہ کیا گیا کہ 3 سال کے دوران انسانی اسمگلروں سے ملی بھگت پر ایف آئی اے کے 51 ملازمین برطرف کیے گئے۔

(جاری ہے)

وزارت داخلہ کے مطابق گزشتہ سال یونان کشتی حادثے میں پاکستانی شہریوں کی اموات کے بعد غیر قانونی طور پر بیرون ملک جانے میں سہولت کاری کرنے پر 41 ایف آئی اے اہلکار برطرف کیے گئے تھے۔

واضح رہے کہ یونان کشتی حادثے میں ایف آئی اے کے افسران اور اہلکاروں کے ملوث ہونے کا انکشاف ہوا تھا، جس کے بعد ان کے نام پاسپورٹ کنٹرول لسٹ میں ڈالنے کا فیصلہ کیا گیا تھا۔ایف آئی اے کے ذرائع نے بتایا کہ فیصل آباد ایئرپورٹ کے 19، سیالکوٹ ایئرپورٹ کے 3، لاہور ایئرپورٹ کے 2، اسلام آباد ایئرپورٹ کے 2 اور کوئٹہ ایئرپورٹ کے 5 افسران کے نام بھی مشتبہ اہلکاروں میں شامل تھے۔