ْایف آئی اے کے 41 لوگوں کو انسانی سمگلنگ میں ملوث ہونے پر نوکری سے نکالا گیا، طلال چوہدری

نوکریوں سے نکالے جانیوالوں میں اسسٹنٹ ڈائریکٹرز بھی ہیں، وزیر مملکت برائے داخلہ

منگل 19 اگست 2025 21:10

اسلام آباد (اُردو پوائنٹ اخبارتازہ ترین - این این آئی۔ 19 اگست2025ء)وزیر مملکت داخلہ سینیٹر طلال چوہدری نے کہا ہے کہ صرف 2024میں ایف آئی اے کے 41 لوگوں کو انسانی سمگلنگ میں ملوث ہونے پر نوکری سے نکالاگیا، 63 لوگ مختلف مقدمات میں نامزد ہوئے۔منگل کو ڈپٹی چیئرمین سیدال خان کی زیر صدارت سینیٹ اجلاس میں اظہار خیال کرتے ہوئے سینیٹر شہادت اعوان نے کہا کہ انسانی اسمگلنگ میں ملوث ایف آئی اے 51 لوگوں کو نوکری سے نکالاگیا، ان 51 لوگوں کو کیا کوئی سزا دی گئی ہی ۔

(جاری ہے)

اس پر طلال چوہدری نے ایوان کو بتایا کہ صرف 2024میں ایف آئی اے کے 41 لوگوں کو نوکری سے نکالاگیا، 3 لوگ مختلف مقدمات میں نامزد ہوئے، ان میں سے صرف 16لوگ بری ہوئے، ان کی بریت کیخلاف بھی پراسیکیوشن اپیلیں کررہی ہے۔دنیش کمار نے کہا کہ نوکریوں سے چھوٹے گریڈ کے لوگوں کو نکالا گیا ہے، چھوٹے عہدوں پر بیٹھے لوگوں کیخلاف کارروائی ہوئی، 17گریڈ سے اوپر والے کتنے افسران کو سزا ہوئی ۔طلال چوہدری نے کہا کہ نوکریوں سے نکالے جانیوالوں میں اسسٹنٹ ڈائریکٹرز بھی ہیں، ہم ان لوگوں کی لسٹ بھی دے دیں گے جو بری ہوئے ہیں۔