اضلاع میں غیر قانونی غیر ملکیوں کیخلاف کارروائی کا فیصلہ

اسلام آباد، پنڈی، اٹک، مری اورہری پورکے ڈپٹی کمشنرزکو خصوصی ٹاسک سونپ دیا گیا

منگل 19 اگست 2025 21:10

اسلام آباد (اُردو پوائنٹ اخبارتازہ ترین - این این آئی۔ 19 اگست2025ء)وفاقی دارالحکومت،راولپنڈی سمیت 5اضلاع کوسیف زون بنانے کیلئے غیر قانونی مقیم غیرملکیوں کیخلاف کریک ڈائون کیلئے ان کا ڈیٹا مرتب کرنے ،موبائل سم کا اجرا روکنے اور لین دین یا جائیدادکی خرید وفروخت کیلئے سٹامپ پیپرزکی فروخت پر پابندی لگانے کافیصلہ کرلیا گیا۔اسلام آباد ،راولپنڈی، اٹک،مری اور ہری پورکے ڈپٹی کمشنرزکوخصوصی ٹاسک سونپ دیے گئے۔

(جاری ہے)

چیف کمشنراسلام آباد محمد علی رندھاواکی زیرصدارت اجلاس ہوا جس میں غیر قانونی مقیم غیر ملکی افراد کیخلاف کارروائی کا فیصلہ کیا گیا۔چیف کمشنر نے ہدایت کی کہ غیر قانونی مقیم غیر ملکیوں کی مستقبل میں دوبارہ آبادکاری کو روکنے کیلئے پلان تشکیل دیا جائے،ان کا ڈیٹا تیار کیا جائے جس میں رہائشی پتے اور دیگر تفصیلات درج ہوں۔5 اضلاع کوسیف زون بنانے کیلئے ایف آئی اے،نادرا کیساتھ ڈیٹا شیئرنگ ہو گی۔گھروں اور ہوٹلوں میں غیرملکی کرایہ داروں کے طور پر رجسٹر نہ ہونے والے افراد کیخلاف بھی کارروائی ہو گی، غیر ملکی افراد اجازت نامہ کے ساتھ قیام کرسکیں گے بصورت دیگر کارروائی ہوگی۔