‎وفاقی وزیرداخلہ محسن نقوی کی ہدایت پرسید پور ماڈل ویلج میں تجاوزات اور غیر قانونی تعمیرات کے خلاف بھرپور آپریشن

اسلام آباد (اُردو پوائنٹ اخبارتازہ ترین - اے پی پی۔ 20 اگست2025ء) ‎وفاقی وزیرداخلہ محسن نقوی کی ہدایت پرسید پور ماڈل ویلج میں تجاوزات اور غیر قانونی تعمیرات کے خلاف بھرپور آپریشن کے دوران اب تک 200 غیر قانونی تعمیرات مسمار، نیشنل پارک کی 191 کنال اراضی قابضین سے واگزار کرا لیا گیا، کئی کئی سال سے کرایہ ادا نہ کرنے والوں سے عمارتیں خالی کرا لی گئیں، اب یہ جائیدادیں نیلام کی جائیں گی۔

ترجمان وزارت داخلہ کے مطابق 360 کنال اراضی پر 2005 کے بعد بنائی گئی غیر قانونی تعمیرات کے خلاف بلاامتیاز آپریشن جاری ہیں۔وفاقی وزیر داخلہ محسن نقوی نےسید پور ماڈل ویلج کا دورہ کیا اور غیر قانونی تعمیرات کے خلاف آپریشن کا جائزہ لیا۔‎وزیر داخلہ محسن نقوی نے سید پور ویلج کے اپ گریڈیشن و بیوٹیفیکیشن کے کاموں پر پیشرفت کا معائنہ کیا۔

(جاری ہے)

‎وزیر داخلہ محسن نقوی نے سید پور ویلج کے اطراف تجاوزات و غیر قانونی تعمیرات کے خلاف بلا تفریق کارروائی جاری رکھنے کا حکم دیا۔وزیرداخلہ محسن نقوی نے غیرقانونی تعمیرات کے خلاف آپریشن پر سی ڈی اے کی کارکردگی کو سراہتے ہوئے کہا کہ علاقے میں ہر طرح کی غیر قانونی تعمیرات کا خاتمہ ترجیح ہے۔ کراچی اور لاہور کے معروف ریسٹورنٹس کو سید پور ویلج میں لایا جائے گا۔

محسن نقوی نے کہا کہ ‎سید پور ویلج کی بحالی سے اسلام آباد کی خوبصورتی میں اضافہ ہوگا اور شہریوں کو نیا تفریحی ماحول میسر آئے گا، ‎سید پور ویلج کو عالمی معیار تفریحی مرکز بنانے کے لیے تمام وسائل بروئے کار لائے جائیں۔‎ ‎وزیر داخلہ نے سی ڈی اے اور ڈی ایم اے حکام کو ویلج کے اطراف صفائی یقینی بنانے کی ہدایت دی۔انہوں نے کہا کہ ‎سید پور ویلج مستقبل کا نیا کمرشل مرکز بنے گا، سیاحوں کو معیاری سہولیات فراہم کی جائیں گی۔

‎وزیر داخلہ کو بریفنگ میں بتایا گیا کہ‎سیٹلائٹ امیجری سے 2005 کے بعد بنائی گئی تعمیرات کی نشاندہی کی جا رہی ہے۔ سید پور ماڈل ویلج کے گرین کور ایریا کو بجال کیا جا رہا ہے۔ ‎چیئرمین سی ڈی اے محمد علی رندھاوا نے سید پور ویلج منصوبے کے تحت ہونے والے کاموں پر پیشرفت کے بارے میں تفصیلی بریفنگ دی۔ ممبران سی ڈی اے، اے ڈی سی جی، ایس ایس پی آپریشنز اور متعلقہ حکام بھی اس موقع پر موجود تھے ۔