پنجاب کے تعلیمی بورڈز کا نہم جماعت کے سالانہ امتحانات کے نتائج کا اعلان

لاہور (اُردو پوائنٹ اخبارتازہ ترین - این این آئی۔ 20 اگست2025ء) پنجاب کے تعلیمی بورڈز نے 9ویں جماعت کے سالانہ امتحانات کے نتائج کا اعلان کر دیا۔لاہور بورڈ آف انٹرمیڈیٹ اینڈ سیکنڈری ایجوکیشن کے سیکرٹری رضوان نذیر اور کنٹرولر امتحانات توصیف الرحمان نے نہم کے سالانہ امتحان کے نتائج کا اعلان کیا۔کنٹرولر امتحانات لاہور بورڈ کے مطابق نویں جماعت کے امتحان میں 3لاکھ 8ہزار 73طلبہ شریک ہوئے جن میں سے ایک لاکھ 38ہزار 894طلبہ کامیاب قرار پائے، لڑکیوں کی کامیابی کی شرح 53.83فیصد جبکہ لڑکوں کی کامیابی کی شرح 35.33فیصد رہی، نہم کے امتحانات میں کامیابی کا تناسب 45.08فیصد رہا۔

سائنس گروپ میں دو لاکھ 35ہزار 247طلبہ شریک ہوئے، جن میں سے ایک لاکھ 11ہزار 681طلبہ کامیاب قرار پائے۔

(جاری ہے)

کنٹرولر امتحانات کے مطابق سائنس گروپ میں کامیابی کی شرح 47.47فیصد رہی جبکہ آرٹس گروپ میں 72ہزار 826طلبہ شریک ہوئے، آرٹس گروپ میں 27ہزار 213طلبہ پاس ہوئے اور کامیابی کی شرح 37.37فیصد رہی، لڑکیوں کی کامیابی کی شرح 53.83 فیصد جبکہ لڑکوں کی کامیابی کی شرح 35.33 فیصد رہی۔

بورڈ آف انٹرمیڈیٹ اینڈ سیکنڈری ایجوکیشن، ملتان نے نویں جماعت کے سالانہ امتحانات 2025 کے نتائج جاری کر دیئے ، امتحانات میں مجموعی طور پر ایک لاکھ 44ہزار 775امیدواروں نے شرکت کی۔جاری کردہ اعداد و شمار کے مطابق 75ہزار 438طلبا و طالبات کامیاب قرار پائے، یوں کامیابی کا مجموعی تناسب 52.11 فیصد رہا۔بورڈ آف انٹرمیڈیٹ اینڈ سیکنڈری ایجوکیشن سرگودھا نے بھی جماعت نہم کے سالانہ امتحان 2025 کے نتائج کا اعلان کر دیا۔

رواں سال کے امتحانات میں مجموعی طور پر ایک لاکھ 12ہزار 492امیدواروں نے شرکت کی، جن میں سے 52ہزار 166 امیدوار کامیاب قرار پائے، یوں کامیابی کا مجموعی تناسب 46.37فیصد رہا۔ضلع سرگودھا سے 63ہزار 540امیدوار شریک ہوئے، جن میں سے 31ہزار 370 کامیاب قرار پائے، کامیابی کا تناسب 49.37فیصد رہا، جبکہ ضلع خوشاب سے 20ہزار 147امیدوار شریک ہوئے، 9ہزار 33نے کامیابی حاصل کی، کامیابی کا تناسب 44.84فیصد رہا۔

ضلع میانوالی کے 23ہزار 750امیدواروں میں سے 10ہزار 96کامیاب ہوئے، کامیابی کا تناسب 42.51فیصد رہا جبکہ ضلع بھکر میں 24ہزار 646طلبا و طالبات نے امتحان دیا، جن میں سے 9ہزار 971کامیاب ہوئے اور کامیابی کا تناسب 40.46فیصد رہا۔بورڈ آف انٹرمیڈیٹ اینڈ سیکنڈری ایجوکیشن فیصل آباد نے نویں جماعت کے سالانہ امتحانات 2025 کے نتائج کا اعلان کر دیا ، امتحانات میں کل دو لاکھ 5ہزار 182طلبا و طالبات نے شرکت کی، جن میں سے ایک لاکھ 57ہزار 569امیدوار کامیاب قرار پائے، رواں سال کامیابی کا تناسب51.55فیصد رہا۔