چیئرمین زکوٰۃ و عشر پنجاب رانا منورغوث خاں کی سلانوالی کھلی کچہری

بدھ 20 اگست 2025 18:19

سرگودھا (اُردو پوائنٹ اخبارتازہ ترین - اے پی پی۔ 20 اگست2025ء) صوبائی چیئرمین زکوٰۃ و عشر پنجاب رانا منورغوث خاں نے اپنے دفتر تحصیل سلانوالی ضلع سرگودھا میں عوامی شکایات سننے کے لیے کھلی کچہری کا انعقاد کیا۔ اس موقع پر تحصیل سلانوالی اور گردونواح کے شہریوں نے بڑی تعداد میں شرکت کی اور اپنی شکایات اور مسائل پیش کئے۔ صوبائی چیئرمین زکوٰۃ و عشر رانا منورغوث خاں نے ذاتی طور پر عوامی مسائل سُنے اور متعلقہ افسران کو ترجیحی بنیادوں پرمیرٹ پر حل کرنے کی ہدایت کی۔

(جاری ہے)

متعدد شکایات کا موقع پر ہی ازالہ کیا گیا جبکہ دیگر کو مزید کارروائی کے لیے نشان زد کیا گیا۔ اس موقع پر رانا منورغوث خاں نے کہا کہ یہ کھلی کچہری وزیراعلیٰ مریم نواز کے وژن کے تحت منعقد کی گئی ہے تاکہ عوامی خدمت کو یقینی بنایا جا سکے۔ انہوں نے اس بات پر روشنی ڈالی کہ صوبہ بھر میں صفائی کا ایک جامع نظام تیار کیا جا رہا ہے اور دیہاتوں کو ماڈل بستیوں میں تبدیل کرنے کے لیے تیزی سے پیش رفت جاری ہے۔ انہوں نے شہریوں کی سہولت کے لیے ریونیو سسٹم میں جدید اصلاحات متعارف کرانے کا بھی ذکر کیا اور تمام دستیاب وسائل کو بروئے کار لاتے ہوئے لوگوں کی خدمت اور ان کے معیار زندگی کو بہتر بنانے کے حکومتی عزم کا اعادہ کیا۔