بھارتی ریلوے کا دیوالی اور چھٹ کے تہواروں پر 12 ہزار خصوصی ٹرینیں چلانے کا فیصلہ

جمعرات 21 اگست 2025 11:34

نئی دہلی (اُردو پوائنٹ اخبارتازہ ترین - اے پی پی۔ 21 اگست2025ء) بھارتی ریلوے نے دیوالی اور چھٹ کے تہواروں پر مسافروں کی سہولت کے طور پر ریاست بہار کے لیے 12 ہزار سے زیادہ خصوصی ٹرینیں چلانے کا فیصلہ کیا ہے۔ یواین آئی کی رپورٹ کے مطابق بھارتی وزیر ریلوے اشونی ویشنو نے بتایا کہ یہ فیصلہ بہار کے نائب وزیر اعلیٰ سمراٹ چودھری کی ایم پی ڈاکٹر سنجے جیسوال ، مرکزی وزیر للن سنگھ اور ایم پی سنجے کمار جھا کے ساتھ بات چیت کے بعد کیا گیا ہے جس کا مقصد مذکورہ بڑے تہواروں دیوالی اور چھٹ کے موقع پر لوگوں کو سفری سہولتوں کی فراہمی کے لئے خصوصی انتظامات کرنا ہے ۔

انہوں نے کہا کہ جو مسافر 13 سے 26 اکتوبر کے درمیان چھٹیوں پر جانے اور 17 نومبر سے 1 دسمبر کے درمیان واپسی کا سفر کریں گے انہیں واپسی کے سفر پر 20 فیصد رعایت کا فائدہ ملے گا۔

(جاری ہے)

یہ تجربہ اس تہوار کے موسم میں کیا جائے گا۔ اس کے علاوہ چار امرت بھارت ایکسپریس ٹرینیں گیا سے دہلی، سہرسہ سے امرتسر، چھپرہ سے دہلی اور مظفر پور سے حیدرآباد شروع کی جائیں گی۔

ساتھ ہی بھگوان بدھ کے خاص مقامات اور متوسط آمدنی والے خاندانوں کے لیے ایک نئی سرکٹ ٹرین شروع کی جائے گی جو ویشالی، حاجی پور، سون پور، پٹنہ، راجگیر، گیا اور کوڈرما سرکٹ کا احاطہ کرے گی۔ انہوں نے کہا کہ بکسر تا لکھی سرائے ریل سیکشن کو چار رویہ بنایا جائے گا تاکہ زیادہ سے زیادہ ٹرینیں چل سکیں، پٹنہ کے ارد گرد رنگ ریلوے کا انتظام کیا جائے گا۔ سلطان گنج اور دیوگھر کو جوڑا جائے گا۔ پٹنہ سے ایودھیا تک نئی ٹرین چلائی جائے گی۔ لوکھا بازار میں دھونے کے گڈھے کا انتظام اور بہار میں منظور شدہ کئی نئے روڈ ز اور اوور برج پر بھی کام کیا جائے گا۔