لبرٹی مارکیٹ لاہور میں ریسٹورنٹ میں اچانک آگ بھڑک اٹھی

ریسکیو فائر فائٹرز کی جانب سے ہوٹل سے ایک شخص کو بحفاظت نکال لیا گیا

ساجد علی جمعرات 21 اگست 2025 15:15

لبرٹی مارکیٹ لاہور میں ریسٹورنٹ میں اچانک آگ بھڑک اٹھی

لاہور ( اُردو پوائنٹ اخبارتازہ ترین۔ 21 اگست 2025ء ) صوبہ پنجاب کے دارالحکومت لاہور میں لبرٹی مارکیٹ کے ریسٹورنٹ میں اچانک آگ لگ گئی۔ تفصیلات کے مطابق لاہو کے علاقہ گلبرگ میں لبرٹی چوک کے قریب نجی ہوٹل کے کچن میں آگ لگنے کے واقعے کے بعد فوری طور پر ریسکیو فائر وہیکلز جائے حادثہ پر پہنچ گئیں، جہاں ریسکیو فائر فائٹرز آگ بجھانے میں مصروف ہیں، اس دوران کیپری ہوٹل سے ایک متاثرہ شخص کو نکال لیا گیا جو آگ لگنے کے بعد ہوٹل میں پھنس گیا تھا، ریسکیو فائر فائٹرز نے ہوٹل میں پھنسے ہوئے اس شخص کو بحفاظت نکالا۔

چند روز قبل لاہور کی شاہ عالم مارکیٹ کے پلازے میں آگ لگ گئی تھی، آتشزگی کا یہ واقعہ لاہور کی معروف شاہ عالم مارکیٹ کے گل پلازہ میں پیش آیا جہاں اچانک آگ بھڑک اٹھی تھی، آگ لگنے سے عمارت کی دوسری منزل پر دھواں بھر گیا، گنجان آباد علاقے اور تنگ گلیوں کے باعث ریسکیو کی گاڑیوں کو پلازے تک پہنچنے میں مشکل ہوئی تاہم اہلکار بروقت جائے وقوعہ پر پہنچنے میں کامیاب رہے۔

(جاری ہے)

اس حوالے سے ترجمان ریسکیو 1122 کا کہنا تھا کہ گل پلازہ میں آگ لگنے کے واقعے کی اطلاع ملتے ہی ریسکیو ٹیمیں موقع پر پہنچ گئیں اور فائر فائٹرز نے فوری طور پر آگ پر قابو پانے کے لیے کوششوں کا آغاز کردیا، جس کے لیے ناصرف پلازے کے باہر سے آگ بجھانے کی کوششیں کی گئی بلکہ ریسکیو اہلکار گل پلازہ کے اندر بھی پہنچنے میں کامیاب ہوئے تاکہ جلد از جلد آگ پر قابو پایا جاسکے، تاہم ابتدائی طور پر آگ لگنے کی وجہ معلوم نہیں ہوسکی تھی۔