جنگ بندی معاہدہ طے پانے کی خبر پر غزہ میں خوشی کا سماں

اسلام آباد (اُردو پوائنٹ ۔ UN اردو۔ 09 اکتوبر 2025ء) غزہ کے لوگ حماس کی سیاسی قیادت اور اسرائیل کے مابین ممکنہ جنگ بندی معاہدے کی خبر پر خوشی منا رہے ہیں۔ اقوام متحدہ کے امدادی اداروں نے تمام یرغمالیوں کی فوری رہائی کا مطالبہ کرتے ہوئے کہا ہے کہ وہ علاقے میں بڑے پیمانے پر انسانی امداد فراہم کرنے کے لیے تیار ہیں۔

اقوام متحدہ کے امدادی رابطہ دفتر (اوچا) کی ترجمان اولگا چیریوکوو نے بتایا ہے کہ امن معاہدے پر دستخط کی خبر آنے کے بعد غزہ میں خوشی بھرا ماحول دیکھنے کو ملا۔

(جاری ہے)

انہوں نے بتایا ہے کہ اقوام متحدہ کی امدادی ٹیموں کے پاس تقریباً ایک لاکھ 70 ہزار میٹرک ٹن خوراک، پناہ کا سامان، ادویات اور دیگر ضروری اشیا غزہ کی سرحدوں پر موجود ہیں اور جنگ بندی نافذ ہوتے ہی اس سامان کو علاقے میں پہنچایا جا سکتا ہے۔

اقوام متحدہ کے سیکرٹری جنرل انتونیو گوتیرش نے بھی غزہ میں جنگ بندی اور یرغمالیوں کی رہائی کے معاہدے کے اعلان کا خیرمقدم کیا ہے۔

جنگ بندی کے لیے پیش رفت

بدھ کی شام امریکہ کے صدر ڈونلڈ ٹرمپ نے اعلان کیا تھا کہ اسرائیل اور حماس نے ان کے 20 نکاتی امن منصوبے کے پہلے مرحلے کی منظوری دے دی ہے۔ یہ پیشرفت مصر میں کئی روز جاری رہنے والے بالواسطہ مذاکرات کے بعد سامنے آئی۔

صدر ٹرمپ نے سوشل میڈیا پر یہ خبر بھی دی کہ حماس نے تمام یرغمالیوں کی واپسی پر رضامندی ظاہر کر دی ہے اور ان کی رہائی سوموار کو عمل میں آ سکتی ہے۔

ان کے یہ بیانات مصر میں جاری اسرائیل اور حماس کے درمیان تیسرے روز کی بالواسطہ بات چیت کے اختتام پر سامنے آئے جہاں امریکی ثالثوں کے ساتھ ساتھ قطر اور ترکیہ کے نمائندے بھی مذاکرات میں شامل تھے۔

اقوام متحدہ کا عزم

'اوچا' کے سربراہ ٹام فلیچر نے کہا ہے کہ یرغمالیوں کی رہائی فوری عمل میں آنی چاہیے اور غزہ کے لوگوں کو بڑے پیمانے پر انسانی امداد پہنچانے کا اہتمام ہونا چاہیے۔

فلسطینی پناہ گزینوں کے لیے اقوام متحدہ کے امدادی ادارے (انروا) کے کمشنر جنرل فلپ لازارینی نے امن معاہدے کو جنگ سے متاثرہ لاکھوں لوگوں کے لیے اطمینان کا موقع قرار دیتے ہوئے کہا ہے کہ اس سے غزہ کے ان شہریوں کی تکالیف میں کمی آئے گی جو دو سال تک شدید بمباری، نقل مکانی، نقصان اور غم کا سامنا کرتے رہے ہیں۔

عالمی ادارہ صحت (ڈبلیو ایچ او) کے سربراہ ٹیڈروز ایڈہانوم گیبریاسس نے بھی امن معاہدے کے اعلان کا خیرمقدم کیا ہے۔ ان کا کہنا ہے کہ غزہ میں ہزاروں زخمیوں اور مریضوں کی حالت انتہائی سنگین ہے۔ جنگ بندی کے بعد ادارہ اپنے کام کو وسعت دینے کے لیے تیار ہے تاکہ تباہ شدہ طبی نظام کی بحالی میں مدد دی جا سکے۔

اقوام متحدہ کے عالمی پروگرام برائے خوراک (ڈبلیو ایف پی) کی ایگزیکٹو ڈائریکٹر سنڈی مکین نے کہا ہے کہ لوگوں کو غذائی مدد پہنچانے کے لیے مزید وقت ضائع کرنے کی گنجائش نہیں ہے۔ ادارہ غزہ میں موجود ہے اور حالات سازگار ہوتے ہی اپنی کارروائیوں میں وسعت لانے کے لیے تیار ہے۔