لاہور میں مختلف حادثات ،واقعات کے دوران 5افراد جاں بحق

امتحان میں فیل ہونے پر نویں جماعت کی 17سالہ طالبہ نے دلبرداشتہ ہو کر خودکشی کرلی

جمعرات 21 اگست 2025 20:44

لاہور(اُردو پوائنٹ اخبارتازہ ترین - این این آئی۔ 21 اگست2025ء)لاہور میں 2مختلف حادثات و واقعات کے دوران 17سالہ طالبہ سمیت 5افراد افراد جاں بحق ہو گئے۔ایدھی ترجمان کے مطابقگلدشت ٹائون کے علاقے چونگی دوگیج میں امتحان میں فیل ہونے پر نویں جماعت کی 17 سالہ طالبہ نے خودکشی کر لی۔نویں جماعت کی طالبہ مناہل امتحانات میں فیل ہونے کے بعد شدید ذہنی دبائو کا شکار ہو گئی تھی، جس نے دل برداشتہ ہو کر زہریلی گولیاں کھا لیں۔

بعد ازاں اس کی حالت بگڑ گئی اور وہ جانبر نہ ہو سکی۔واقعے کے بعد پولیس نے قانونی کارروائی مکمل کرکے لاش کو ایدھی ایمبولینس کے ذریعے مردہ خانے منتقل کر دیا۔ افسوسناک واقعے سے علاقے میں غم کی فضاء ہے۔پولیس کے مطابق غالب مارکیٹ ایف سی کالج انڈر پاس میں کھڑے ٹرک سے موٹر سائیکل پیچھے سے ٹکرا گئی، حادثے کے نتیجے میں موٹر سائیکل سوار 2افراد موقع پر ہی دم توڑ گئے، جاں بحق ہونے والوں میں 30 سالہ فخر عباس اور 30 سالہ علی شیر شامل ہیں۔

(جاری ہے)

پولیس کے مطابق متوفین کی میتیں مردہ خانے منتقل کر کے مزید تحقیقات شروع کردی گئی۔مغلپورہ، دھرم پورہ ریلوے پھاٹک کے قریب راہگیر چلتی ریل گاڑی سے ٹکرا گیا، حادثے کے نتیجے میں 60سالہ نامعلوم شخص جان کی بازی ہار گیا۔پولیس نے مزید بتایا کہ لاش مردہ خانے منتقل کردی گئیں، شناخت سمیت دیگر پہلوئوں پر تحقیقات جاری ہے۔دوسری جانب جوہر ٹائون کے ایک گھر سے پھندا لگی لاش برآمد ہوئی ۔ پولیس کے مطابق جوہر ٹائون جٹ چوک میں رہائش پذیر 35سالہ محمد رضوان نجی یونیورسٹی میں پروفیسر تھا جو کہ اپنے گھر میں مردہ پایا گیا اور گلے میں پھندا لگا تھا ۔ پولیس نے لاش مردہ خانے منتقل کر دی اور خودکشی سمیت تمام پہلوئوں پر تفتیش جاری ہے۔