راولپناڈی، نیب نے 3 ارب سے زائد رقم کمپنی سے لے کر فراڈ کا شکار متاثرین کو دلوادی

ملزمان سے 100فیصد لوٹی رقم وصول کر کے متاثرین کو واپس کرنا نصب العین ہے، چیئرمین نیب

جمعرات 21 اگست 2025 21:25

راولپنڈی (اُردو پوائنٹ اخبارتازہ ترین - این این آئی۔ 21 اگست2025ء)نیب راولپنڈی نے شہریوں سے فراڈ کرنے والی کمپنی کے 17ہزار 500متاثرین کو ادائیگیاں شروع کردیں، 3 ارب سے زائد کی رقم متاثرین میں تقسیم کی گئی۔متاثرین میں وصول شدہ رقوم کے چیک کی تقسیم کیلئے منعقدہ تقریب سے خطاب کرتے ہوئے چیئرمین نیب لیفٹیننٹ جنرل (ر)نذیر احمد نے کہا کہ ملزمان سے 100 فیصد لوٹی ہوئی رقم وصول کر کے متاثرین کو واپس کرنا نصب العین ہے۔

انہوں نے کہا کہ آئندہ متاثرین کو اپنی رقم وصول کرنے کیلیے نیب دفاتر آنے کی ضرورت نہیں پڑے گی، رقم ان کے بینک اکائونٹس میں براہ راست منتقل کر دی جائے گی، اب تک 10ہزار متاثرین کو مکمل رقم ادا کی جا چکی ہے، یہ پاکستان کے سب سے بڑے مالیاتی فراڈز میں سے ایک ہے۔

(جاری ہے)

نیب اعلامیہ میں کہا گیا کہ ملزمان نے شیل کمپنیوں کے ذریعے آن لائن فراڈ سکیم کے طور پر چلایا، فراڈ سکیم کے تحت عوام سے 7فیصد ماہانہ منافع کے وعدے کے تحت اربوں روپے جمع کیے گئے۔

نیب نے معاملے کی تحقیقات 5فروری 2021ء کو شروع کیں، تحقیقات کے دوران نیب نے ملزمان کے 56بینک اکائونٹس، جائیدادوں اور دیگر اثاثوں کو منجمد کیا، نیب نے آن لائن ڈیٹا ڈائون لوڈ کرکے متاثرین کے دعووں کی تصدیق بھی کی۔اعلامئے کے مطابق قانونی کارروائیوں کے نتیجے میں 7.3ارب روپے کی ریکوری کا عمل شروع کیا گیا، ابتدائی مرحلے میں 3.7ارب روپے کی رقم 17,500متاثرین میں تقسیم کی جا رہی ہے، اب تک 10ہزار متاثرین کو مکمل رقم ادا کی جا چکی ہے، باقی 7,500متاثرین کو ان کی رقم کا 40فیصد ابھی دیا جا رہا ہے، بقیہ 60فیصد رقم ملزمان کی جائیدادوں کی نیلامی کے بعد چھ ماہ کے اندر ادا کی جائے گی۔