سعودی عرب اور امریکاکے درمیان فوجی شراکت داری کا معاہدہ

جمعہ 22 اگست 2025 10:40

ریاض (اُردو پوائنٹ اخبارتازہ ترین - اے پی پی۔ 22 اگست2025ء) سعودی عرب کی وزارت دفاع کا امریکی نیشنل گارڈ کے ساتھ فوجی شراکت داری کا معاہدہ طے پا گیا ، جس میں ریاستِ انڈیانا اور اوکلاہوما کے وفود نے بھی شرکت کی۔العربیہ اردو کے مطابق یہ معاہدہ ریاض کے افسران کلب میں منعقدہ تقریب کے دوران طے پایا، جس میں دونوں ممالک کے اعلیٰ حکام اور سعودی وزارت داخلہ اور نیشنل گارڈ کے ذمہ دار بھی موجود تھے۔

معاہدہ کئی اہم شعبوں کا احاطہ کرتا ہے، جن میں مشترکہ دفاعی صلاحیتوں کی ترقی، سعودی مسلح افواج کی تیاری میں اضافہ، مشترکہ فوجی مشقیں، کمانڈ اورسٹریٹجک منصوبہ بندی کی تربیت، ہنگامی حالات اور آفات سے نمٹنے کے انتظام میں بہتری اور پائیدار ادارہ جاتی شراکت داری قائم کرنا شامل ہے۔

(جاری ہے)

مستقبل میں منصوبوں میں دونوں ممالک میں دو طرفہ دورے، مشترکہ فیلڈ مشقیں، افسران کے تبادلے، تجربات کا تبادلہ، قیادت، منصوبہ بندی، مصنوعی ذہانت ، بحران سے نمٹنے کے شعبوں میں ورکشاپس اور ثقافتی و معاشرتی منصوبے شامل ہوں گے، جو دونوں فریقین کے تعاون اور قربت کو بڑھائیں گے۔

یہ معاہدہ امریکی وزارت دفاع کے بین الاقوامی شراکت داری پروگرام (ای پی پی ) کے تحت آتا ہے، جو دنیا بھر میں 115 سے زیادہ شراکت داریوں پر مشتمل ہے اور تربیت، تجربات کے تبادلے اور سکیورٹی و استحکام کے فروغ کے ذریعے دفاعی تعاون کو مضبوط بناتا ہے۔معاہدے پر سعودی وزارت دفاع کی جانب سے چیئرمین آف جنرل سٹاف فریق اوّل الركن فیاض الرویلي، اور امریکی جانب سے چیف نیشنل گارڈ آفس فریق اوّل سٹیفن نوردہاؤس، اوکلاہوما نیشنل گارڈ کے جنرل ٹومس مانسینو، اور انڈیانا نیشنل گارڈ کے بریگیڈیئر لارنس میونخ نے دستخط کیے۔