پاکستان میں پہلی جدید آئی وی ایف لیب کا قیام، لائیو سٹاک سیکٹر میں نئے دور کا آغاز

جمعہ 22 اگست 2025 12:59

اسلام آباد (اُردو پوائنٹ اخبارتازہ ترین - اے پی پی۔ 22 اگست2025ء) خصوصی سرمایہ کاری سہولت کونسل (ایس آئی ایف سی) اور گرین پاکستان انیشی ایٹو کی کاوشوں سے لائیو سٹاک سیکٹر میں جدید اصلاحات متعارف کرائی جارہی ہیں جس کے تحت ملک میں پہلی جدید آئی وی ایف لیب کا قیام عمل میں لایا گیا ہے جس سے لائیو سٹاک سیکٹر میں نئے دور کا آغاز ہوگا۔ پنجاب کے صوبائی وزیر عاشق حسین کرمانی نے خانیوال میں فون گرو کی جدید آئی وی ایف لیبارٹری کا افتتاح کیا۔

تقریب میں سیکرٹری لائیو سٹاک، بریڈنگ ڈائریکٹوریٹ کے اعلی ٰ حکام ، ویٹرنری ماہرین اور دیگر شراکت داروں نے بھی شرکت کی۔ پاکستان میں پہلی جدید آئی وی ایف لیب کے قیام سے تولیدی ٹیکنالوجی کے نئے دور کا آغاز ہوا ہے جس سے جدید تولیدی بائیوٹیکنالوجی سے اعلیٰ نسلوں کی افزائش، بیماریوں سے تحفظ اور پیداوار میں اضافہ ممکن ہوگا ۔

(جاری ہے)

اس موقع پرصوبائی وزیر نے سیمن پروڈکشن یونٹ، پیڈاکس اور جانوروں کے شیڈز کا بھی معائنہ کیا۔

واضح رہے کہ فون گرو نے 100 کامیاب آئی وی ایف کیسز کا سنگ میل عبور کر لیاہے،نئی لیبارٹری ملک بھر میں ڈیزیز کنٹرول کمپارٹمنٹ پروٹوکولز کے نفاذ میں کلیدی کردار ادا کرے گی۔ ایس آئی ایف سی کی موثر حکمت عملی سے پاکستان کا لائیو سٹاک سیکٹر جدید خطوط پر استوارہوگا۔