سعودی عرب اور امریکاکے درمیان فوجی شراکت داری کا معاہدہ

معاہدہ ریاض کے افسران کلب میں منعقدہ تقریب کے دوران طے پایا،حکام

جمعہ 22 اگست 2025 13:55

ریاض(اُردو پوائنٹ اخبارتازہ ترین - این این آئی۔ 22 اگست2025ء)سعودی عرب کی وزارت دفاع کا امریکی نیشنل گارڈ کے ساتھ فوجی شراکت داری کا معاہدہ طے پا گیا ، جس میں ریاستِ انڈیانا اور اوکلاہوما کے وفود نے بھی شرکت کی۔عرب ٹی وی کے مطابق یہ معاہدہ ریاض کے افسران کلب میں منعقدہ تقریب کے دوران طے پایا، جس میں دونوں ممالک کے اعلی حکام اور سعودی وزارت داخلہ اور نیشنل گارڈ کے ذمہ دار بھی موجود تھے۔

(جاری ہے)

معاہدہ کئی اہم شعبوں کا احاطہ کرتا ہے، جن میں مشترکہ دفاعی صلاحیتوں کی ترقی، سعودی مسلح افواج کی تیاری میں اضافہ، مشترکہ فوجی مشقیں، کمانڈ اورسٹریٹجک منصوبہ بندی کی تربیت، ہنگامی حالات اور آفات سے نمٹنے کے انتظام میں بہتری اور پائیدار ادارہ جاتی شراکت داری قائم کرنا شامل ہے۔مستقبل میں منصوبوں میں دونوں ممالک میں دو طرفہ دورے، مشترکہ فیلڈ مشقیں، افسران کے تبادلے، تجربات کا تبادلہ، قیادت، منصوبہ بندی، مصنوعی ذہانت ، بحران سے نمٹنے کے شعبوں میں ورکشاپس اور ثقافتی و معاشرتی منصوبے شامل ہوں گے، جو دونوں فریقین کے تعاون اور قربت کو بڑھائیں گے۔