مذہبی تہواروں پر اتفاق رائے قومی وحدت کیلئے ناگزیر ہے، کامران ٹیسوری

جمعہ 22 اگست 2025 20:40

کراچی (اُردو پوائنٹ اخبارتازہ ترین - اے پی پی۔ 22 اگست2025ء) گورنر سندھ کامران خان ٹیسوری سے مرکزی چیئرمین رویت ہلال کمیٹی مولانا عبدالخبیر آزاد نے گورنر ہاؤس میں ملاقات کی اور مذہبی ہم آہنگی، قومی یکجہتی اور ربیع الاول کے انتظامات پر تفصیلی مشاورت کی گئی۔ اس موقع پر گورنر سندھ نے کہا کہ تمام مکاتبِ فکر کو ساتھ لے کر چلنا وقت کی اہم ضرورت ہے۔

انہوں نے کہا کہ مذہبی تہواروں پر اتفاق رائے قومی وحدت کے لیے ناگزیر ہے ۔

(جاری ہے)

گورنر سندھ نے علماء کے کردار کو معاشرتی ہم آہنگی کے فروغ میں کلیدی حیثیت کا حامل قرار دیا۔ مولانا عبدالخبیر آزاد نے گورنر سندھ کے مختلف اقدامات کو سراہتے ہوئے کہا کہ معرکہ حق، جشنِ آزادی تقریبات اور گورنر انیشیٹیوز عوامی فلاح کے لیے قابلِ قدر ہیں۔ انہوں نے کہا کہ آئی ٹی کلاسز، امید کی گھنٹی اور راشن ڈرائیو جیسے منصوبے قابلِ تقلید اقدامات ہیں۔ چیئرمین رویت ہلال کمیٹی نے گورنر سندھ کی جانب سے لیپ ٹاپ، موٹر سائیکل اور دیگر مالی معاونت کی فراہمی کو بلاتفریق عوامی خدمت کا بہترین نمونہ قرار دیا۔