جیکب آباد کے گرلز پرائمری اسکول کے سامنے گندگی کے ڈھیر، طالبات اور مکین شدید پریشان

ہفتہ 23 اگست 2025 20:50

جیکب آباد (اُردو پوائنٹ اخبارتازہ ترین - این این آئی۔ 23 اگست2025ء)جیکب آباد کے گرلز پرائمری اسکول کے سامنے گندگی کے ڈھیر، طالبات اور مکین شدید پریشان۔

(جاری ہے)

تفصیلات کے مطابق جیکب آباد کے گورنمنٹ گرلز پرائمری اسکول محمد حیات اوستو پارک کے سامنے گندگی کے ڈھیر لگ جانے سے نہ صرف طالبات کو مشکلات کا سامنا ہے بلکہ اردگرد کے مکین بھی شدید پریشان ہیں بارہا شکایات کے باوجود بلدیہ کی طرف سے صفائی نہ کیے جانے پر شہریوں نے افسوس اور برہمی کا اظہار کیا ہے اسکول کے باہر کچرے کے ڈھیر کے باعث ماحول بدبو دار اور غیر صحت مند ہوگیا ہے والدین اور مکینوں نے کہا ہے کہ اسکول کا اندرونی اور بیرونی ماحول بچوں کی ذہنی و جسمانی نشوونما پر براہ راست اثر انداز ہوتا ہے لیکن بلدیہ کی غفلت کے باعث معصوم طالبات کے لیے تعلیم کا ماحول متاثر ہو رہا ہے ، شہریوں نے کہا کہ اگر سکول کا ماحول صاف ستھرا ہو تو بچے نہ صرف خوشی سے تعلیم میں دلچسپی لیتے ہیں بلکہ بیماریوں سے بھی محفوظ رہتے ہیں صفائی ستھرائی کا عمل صرف کلاس رومز تک محدود نہیں ہونا چاہیے بلکہ اسکول گیٹ کے باہر، کھیل کے میدان، پانی کے ذرائع اور واش رومز کی صفائی بھی ضروری ہے تاکہ صحت مند معاشرتی روایت قائم ہو سکے تعلیمی ماہرین کے مطابق بچپن میں سیکھی گئی عادتیں زندگی بھر قائم رہتی ہیں اگر ابتدائی عمر ہی سے بچوں کو صفائی کی اہمیت کا عملی تجربہ دیا جائے تو وہ مستقبل میں صحت مند، باشعور اور ذمہ دار شہری بن سکتے ہیں والدین کا کہنا ہے کہ خاص طور پر چھوٹی بچیوں کے لیے صاف ستھرا ماحول نہایت ضروری ہے تاکہ وہ بیماریوں سے محفوظ رہ کر بہتر تعلیم حاصل کرسکیں، شہریوں اور والدین نے ضلعی انتظامیہ، محکمہ تعلیم اور میونسپل کمیٹی سے مطالبہ کیا ہے کہ اسکول کے قریب موجود کچرے کے ڈھیر کو فوری طور پر ہٹا کر صفائی کو یقینی بنائی جائے تاکہ سینکڑوں طالبات محفوظ اور صحت مند ماحول میں تعلیم جاری رکھ سکیں۔