سندھ کی جامعات کے ڈائریکٹر فنانس کی تنخواہوں میں اضافہ، تنخواہ 4لاکھ48ہزارتک پہنچ گئی

سندھ ہائر ایجوکیشن کمیشن کے چیئرمین کی سفارش پروزیراعلی نے تنخواہوں میں اضافے کی منظوری دی

میاں محمد ندیم جمعرات 28 اگست 2025 15:15

سندھ کی جامعات کے ڈائریکٹر فنانس کی تنخواہوں میں اضافہ، تنخواہ 4لاکھ48ہزارتک ..

کراچی(اردوپوائنٹ اخبارتازہ ترین-انٹرنیشنل پریس ایجنسی۔28 اگست ۔2025 )وزیر اعلی سندھ مراد علی شاہ نے سندھ ہائر ایجوکیشن کمیشن کے چیئرمین پروفیسر ڈاکٹر طارق رفیع کی سفارش پر صوبے کی سرکاری جامعات میں کم تنخواہیں لینے والے ڈائریکٹر فنانس کی تنخواہوں میں اضافے کی منظوری دے دی سندھ حکومت کی جانب سے تنخواہوں میں اضافے کا باقاعدہ نوٹیفکیشن جاری کردیا گیا .

(جاری ہے)

محکمہ بورڈز و جامعات کے سیکشن افسر کمال احمد کے جاری کردہ نوٹیفکیشن کے مطابق ایم پی اسکیل Il کے تحت جامعات کے ڈائریکٹرز فنانس کی تنخواہ اب 448280 روپے ہوگئی ہے نوٹیفکیشن میں کہا گیا ہے کہ ڈی ایف کی بنیادی تنخواہ 263,180 روپے ہوگی، گھر کے کرائے کی مد میں 95,700 روپے، یوٹیلیٹیز کی مد میں 11,970 روپے اور منافع کی مد میں 77,430 روپے ملیں گے، اس کا اطلاق فوری ہوگا.

یاد رہے کہ چیئرمین سندھ ایچ ای سی پروفیسر ڈاکٹر طارق رفیع نے ایک سمری بھی وزیر اعلی سندھ کو ارسال کی تھی جس میں کہا گیا تھا کہ وفاقی طور پر چارٹرڈ جامعات، پنجاب اور خیبرپختونخوا کے صوبوں میں ڈائریکٹر فنانس کو BPS-20 میں مستقل بنیادوں پر تعینات کیا جاتا ہے تاہم ڈائریکٹر فنانس کا تقرر بلوچستان میں BPS-20/21 میں 4 سال کی مدت پر کیا جاتا ہے.

سمری میں کہا گیا تھا کہ کم تنخواہ پیکیج کی وجہ سے کئی جامعات میں ڈائریکٹرز فنانس جوائن نہیں ہوئے یا جوائن کرنے سے انکار کردیا، اس خلا کو پر کرنے کے لئے حکومت سندھ نے سرچ کمیٹی کی سفارشات پر کئی ڈائریکٹرز فنانس کا تقرر ویٹنگ لسٹ سے کیا سمری کے مطابق ڈائریکٹر فنانس کے عہدے کی اہمیت کو مد نظر رکھتے ہوئے اور یونیورسٹیوں میں اہل افراد کو برقرار رکھنے کے لئے چیئرمین سندھ ایچ ای سی نے دوبارہ سفارش کی کہ وزیر اعلی سندھ ڈائریکٹر فنانس کی تنخواہ کم از کم 5 لاکھ روپے مقرر کریں.