Live Updates

’اداروں کا کام پارلیمان چلانا نہیں‘ سپیکر خیبر پختونخواہ اسمبلی کا ڈی جی آئی ایس پی آر کے نام پیغام

ہمارے بچے وطن کا دفاع کرتے ہیں، آپ سمجھیں اور محبتوں کو برقرار رہنے دیں، آئین اور قانون کے تحت اِس صوبے اور مُلک کو چلنے دیں؛ بابر سلیم سواتی کے اجلاس کے دوران ریمارکس

ساجد علی پیر 13 اکتوبر 2025 12:34

’اداروں کا کام پارلیمان چلانا نہیں‘ سپیکر خیبر پختونخواہ اسمبلی کا ..

پشاور ( اُردو پوائنٹ اخبارتازہ ترین۔ 13 اکتوبر2025ء ) خیبرپختونخواہ کے نئے وزیراعلیی کے انتخاب کے دوران سپیکر بابر سلیم سواتی نے ڈی جی آئی ایس پی آر کی پریس کانفرنس پر ان کے لیے جوابی پیغام بھیج دیا۔ تفصیلات کے مطابق نئے قائدِ ایوان کے انتخاب کیلئے خیبرپختونخواہ اسمبلی کا اجلاس ہوا، جس کی صدارت سپیکر بابر سلیم سواتی نے کی، صوبائی اسمبلی کے اجلاس کے دوران علی امین گنڈاپور نے تصدیق کرتے ہوئے کہا کہ جس دن عمران خان نے حکم دیا اسی دن استعفیٰ دے دیا تھا، اگر کوئی شک ہے تو میں پھر فخر کے ساتھ اعلان کر رہا ہوں کہ اللہ نے مجھے یہ موقع دیا، مجھ پر یہ وقت آیا کہ جہاں ثابت ہونا تھا کہ کُرسی بڑی ہے یا اپنے لیڈر کا حکم، اللہ نے مجھے کامیاب کیا، وفاداری اور عزت ہمیں اسلام اور آباؤ و اجداد نے بتائی ہے، میری کارگردگی اچھی تھی یا بری سب کے سامنے ہے۔

(جاری ہے)

انہوں نے کہا کہ جس جنگ کے لئے ہمارا لیڈر قربانی دے رہا ہے، ہم مل کر اِس جنگ کو لڑیں گے اور کامیاب ہوں گے کیوں کہ یہاں جمہوریت کے ساتھ مذاق ہوتا آرہا ہے، ہماری پارٹی، ہماری مرضی، ہمارا فیصلہ، ہماری مرضی، ہماری اکثریت، ہماری مرضی اور سب سے بڑھ کر ہمارا لیڈر اور اُس کی مرضی، نئے وزیراعلیٰ کے عمل میں تاخیری حربے استعمال نہ کریں، ہم مزید کچھ برداشت نہیں کریں گے۔

اس موقع پر سپیکر خیبرپختونخواہ اسمبلی بابر سلیم سواتی نے علی امین گنڈاپور کے استعفیٰ کو آئینی قرار دیتے ہوئے اس کی توثیق کردی اور رولنگ دی کہ تمام معاملات آئین کے مطابق ہوئے ہیں، وزیراعلی کے انتخاب کا جو طریقہ اختیار کیا وہ عین آئین کے مطابق ہے، اِس ملک میں چند لوگوں کی خواہش ہے کہ سُہیل آفریدی وزیراعلیٰ نہ بنیں لیکن آئین لوگوں کی خواہشات پر نہیں چل سکتا۔

انہوں نے کہا کہ میں ڈی جی آئی ایس پی آر کو کہنا چاہتا ہوں کہ ہم اب بھی آپ سے محبت کرتے ہیں کیوں کہ ہمارے بچے وطن کا دفاع کرتے ہیں، وطن کی حفاظت میں شہید ہونے والے ہمارے بچے ہیں، مگر اداروں کا کام پارلیمان چلانا نہیں ہے، اگر آپ اس کام میں مداخلت کریں گے تو محبت کیسے بڑھے گی؟ آپ سمجھیں اور محبتوں کو برقرار رہنے دیں، آئین اور قانون کے تحت اِس صوبے اور مُلک کو چلنے دیں۔