دبئی میں آئی ایل ٹی20 ڈویلپمنٹ ٹورنامنٹ کے دلچسپ مقابلے، چار ٹیموں نے کامیابی سمیٹ لی

جمعرات 28 اگست 2025 23:36

دبئی(اُردو پوائنٹ اخبارتازہ ترین - این این آئی۔ 28 اگست2025ء) آئی سی سی اکیڈمی دبئی میں جاری تیسرے ایڈیشن کے ڈی پی ورلڈ آئی ایل ٹی20 ڈویلپمنٹ ٹورنامنٹ میں سنسنی خیز مقابلوں میں ڈیزرٹ وائپرز ڈویلپمنٹ، ابو ظہبی نائٹ رائیڈرز ڈویلپمنٹ، ایم آئی ایمیریٹس ڈویلپمنٹ اور گلف جائنٹس ڈویلپمنٹ نے اپنی اپنی فتوحات حاصل کرلیں۔تفصیلات کے مطابق گلف جائنٹس ڈویلپمنٹ نے ڈیزرٹ وائپرز کو 6 رنز سے شکست دی۔

محمد افتاب عالم اور زاہد علی نے نمایاں کارکردگی دکھائی جبکہ ڈیزرٹ وائپرز کی جانب سے اویس احمد اور سانجے پاہل نے شاندار بولنگ کی۔ تنیش سوری کی نصف سنچری کے باوجود وائپرز ہدف حاصل نہ کر سکے۔ دوسرے میچ میں ایم آئی ایمیریٹس ڈویلپمنٹ نے دبئی کیپیٹلز ڈویلپمنٹ کو 42 رنز سے ہرایا۔

(جاری ہے)

وریتیا اروند اور لوپریت سنگھ کی جارحانہ بیٹنگ نے ٹیم کو بڑے مجموعے تک پہنچایا، جبکہ محمد محسن اور فراز الدین نے بولنگ میں کامیابیاں سمیٹیں۔

ڈیزرٹ وائپرز نے شارجہ واریئرز کو 3 وکٹوں سے مات دی۔ رئیس احمد کی دھواں دھار اننگز کے باوجود آخری اوورز میں سانجے پاہل کی جارحانہ بلے بازی نے وائپرز کو فتح دلائی۔ ابو ظہبی نائٹ رائیڈرز ڈویلپمنٹ نے ایم آئی ایمیریٹس ڈویلپمنٹ کو 73 رنز سے شکست دی۔ سگر کلیان اور رونک پینولی نے بیٹنگ میں شاندار آغاز فراہم کیا، جبکہ اویسد امین نے تباہ کن بولنگ کرتے ہوئے صرف 11 رنز دے کر 5 وکٹیں حاصل کیں۔