پنجاب حکومت کا 30 ہزار نئی انڈر گریجویٹ اسکالرشپس دینے کا اعلان

جمعرات 28 اگست 2025 22:30

ٍلاہور(اُردو پوائنٹ اخبارتازہ ترین - آن لائن۔ 28 اگست2025ء)پنجاب حکومت نے وزیر اعلیٰ ہونہار انڈر گریجویٹ اسکالرشپ پروگرام 2025 کے تحت 30 ہزار نئی اسکالرشپس دینے کا اعلان کر دیا ہے۔اس اسکالرشپ پروگرام کے تحت طلبہ کی مکمل ٹیوشن فیس حکومت ادا کرے گی۔ اس اقدام سے کم اور متوسط آمدنی والے خاندانوں کے ہزاروں طلبہ کو اعلیٰ تعلیم حاصل کرنے کا موقع ملے گا۔

(جاری ہے)

امیدوار کے لیے ضروری ہے کہ وہ ایف اے، ایف ایس سی یا آئی سی ایس میں کم از کم 70 فیصد نمبر حاصل کر چکا ہو۔پروگرام کا مقصد نوجوانوں کو طب، سائنس، آرٹس اور دیگر شعبوں میں تعلیم کے مواقع فراہم کرنا ہے۔ نئی اسکالرشپس کے لیے درخواست گزار کا پنجاب کا ڈومیسائل ہونا لازمی ہے اور ان کے خاندان کی ماہانہ آمدنی ساڑھے 3 لاکھ 50 ہزار روپے سے زیادہ نہیں ہونی چاہیے۔اسکالرشپس کے لیے طلبہ کو پنجاب ہائر ایجوکیشن کمیشن کے پورٹل (PHEC) پر آن لائن اپلائی کرنا ہوگا۔ کاغذی درخواستیں قبول نہیں کی جائیں گی، جبکہ درخواست جمع کرانے کی آخری تاریخ 15 ستمبر 2025 مقرر کی گئی ہے۔