اے این ایف کا ملک گیر کریک ڈاؤن، 4کروڑ 80 لاکھ روپے سے زائد مالیت کی منشیات برآمد

تمام گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات شروع کر دی گئی

جمعہ 29 اگست 2025 12:20

راولپنڈی(اُردو پوائنٹ اخبارتازہ ترین - این این آئی۔ 29 اگست2025ء)اینٹی نارکوٹکس فورس کا ملک کے مختلف شہروں میں منشیات سمگلنگ کے خلاف بڑے پیمانے پر کریک ڈاؤن جاری ہے۔اے این ایف کی 7 مختلف کارروائیوں کے دوران خاتون سمیت 8 ملزمان کو گرفتار کرلیا گیا ،جبکہ مجموعی طور پر 210 کلوگرام سے زائد منشیات برآمد ہوئی ہے، جن کی مالیت 4 کروڑ 80 لاکھ روپے سے زائد بتائی جا رہی ہے۔

علامہ اقبال انٹرنیشنل ایئرپورٹ لاہور پر کارروائی کے دوران عمرہ پر جانے والے ایک مسافر کے سامان سے 2.522 کلو زینیکس گولیاں برآمد ہوئیں اور ملزم کو موقع پر گرفتار کر لیا گیا،اسی طرح باچا خان انٹرنیشنل ایئرپورٹ پشاور پر قطر جانے والے مسافر سے 994 گرام آئس برآمد ہوئی۔بھیرہ انٹرچینج کے قریب کارروائی کے دوران ایک گاڑی سے 102 کلو چرس اور 42 کلو افیون برآمد ہوئی، جب کہ مندرہ ٹول پلازہ کے قریب گاڑی سے 36 کلو چرس ضبط کر کے خاتون سمیت 2 ملزمان کو گرفتار کیا گیا۔

(جاری ہے)

رنگ روڑ پشاور کے قریب ایک گاڑی سی20 کلو ہیروئن برآمد ہوئی اور 2 افراد کو حراست میں لے لیا گیا، جبکہ آر سی ڈی روڈ، حب کے قریب کارروائی میں 5 کلو آئس پکڑی گئی اور مزید 2 ملزمان گرفتار ہوئے۔اے این ایف حکام کے مطابق تمام گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات شروع کر دی گئی ہیں۔